Գերմանիան հետախուզական ինքնաթիռներ է տեղակայելու Թուրքիայում

Բունդեսվերի մամուլի խոսնակը հայտարարել է, որ Գերմանիայի բունդեսթագում հաստատվելուց հետո ԻՊ դեմ պայքարի շրջանակներում 6 Tornado հետախուզական ինքնաթիռներ, ինչպես նաև մեկ ֆրեգատ է տեղակայվելու Թուրքիայում ու այդ երկրի ջրային տարածքներում։ Այս մասին դեկտեմբերի 1-ին հայտնում է բրիտանական Reuters լրատվական գործակալությունը։

Եվրոպական արտադրության Tornado հետախուզական ինքնաթիռ. Գերմանիայի ՌՕՈւ

Գերմանիայի կանցլեր Անգելա Մերկելը դեռևս նոյեմբերի 13-ին Փարիզում իրականացված ահաբեկչական գործողություններից հետո Ֆրանսիայի նախագահի հետ հանդիպման ժամանակ հայտարարել էր, որ Գերմանիան ևս ցանկանում է ընդլայնել իր մասնակցությունը «Իսլամական պետություն» ահաբեկչական խմբավորման դեմ տարվող պայքարում՝ պատրաստ լինելով օժանդակել Ֆրանսիային։

Այդ նպատակով Գերմանիան նախատեսում է մեկ տարի ժամկետով 1200 զինվորականներ, 6 Tornado հետախուզական ինքնաթիռ, նաև մեկ տրանսպորտալիցքավորող ինքնաթիռ ներգրավել ԻՊ դեմ պայքարում։ Դրանից զատ, Սիրիայում գործողություններ իրականացնելու համար ուղարկված ֆրանսիական «Շարլ դը Գոլ» ավիակրի պաշտպանության համար Գերմանիան տեղակայելու է մեկ ֆրեգատ։

Ի հավելումն այս հայտարարության՝ 2015-ի դեկտեմբերի 1-ին Բունդեսվերի մամուլի խոսնակ Յենս Ֆլոսդորֆը հայտարարել է, որ բունդեսթագում հաստատվելու պարագայում՝ մյուս շաբաթ արդեն 2 միավոր հետախուզական ինքնաթիռ կտեղակայվի Թուրքիայի «Ինջիրլիք» ավիաբազայում, իսկ մնացած ինքնաթիռները տեխնիկական խնդիրների պատճառով կտեղակայվեն 2016-ի հունվարից։

Նշվում է, որ ԻՊ դեմ պայքարում ձեռնարկվելիք նոր միջոցառումները Գերմանիայի համար կարժենան շուրջ 142 մլն դոլար։