Նոյեմբերի 16-ին Ռուսաստանի նախագահ Վլադիմիր Պուտինի անցկացրած խորհրդակցության ժամանակ ՌԴ անվտանգության դաշնային ծառայության պետը հայտնել է, որ հոկտեմբերի 31-ին Եգիպտոսում ռուսաստանյան ինքնաթիռի անկման պատճառը եղել է ահաբեկչությունը: Այս մասին նոյեմբերի 17-ին հայտնում է ՌԴ նախագահի կայքը:
224 մարդու մահվան պատճառ դարձած ինքնաթիռի անկման վերաբերյալ խորհրդակցության ժամանակ անվտանգության դաշնային ծառայության պետ Ալեկսանդր Բորտնիկովը հայտնել է, որ ինքնաթիռի մասերի և դրանում եղած անձնական իրերի փորձաքննության արդյունքում դրանց բոլորի վրա հայտնաբերվել են արտասահմանյան ծագման ինքնաշեն պայթուցիկ սարքի պայթյունի հետքեր: Ռուսաստանյան փորձագետների եզրակացության համաձայն՝ ինքնաթիռում եղած, տրոտիլի 1կգ-ին համարժեք պայթուցիկ սարքը գործի է դրվել թռիչքի ժամանակ, ինչով էլ պայմանավորված է ինքնաթիռի բեկորների ցրվածությունը:
Բորտնիկովի խոսքով՝ կարելի է միանշանակ պնդել, որ դա ահաբեկչություն է եղել:
Այս եզրակացությանն անդրադառնալով՝ ՌԴ նախագահ Վլադիմիր Պուտինը հայտարարել է, որ Սինայում (Եգիպտոս) ռուսաստանցիների սպանությունն առավել արյունալի հանցագործություններից է, և որ իրենք գտնելու են մեղավորներին և պատժեն նրանց:
«Սիրիայում մեր ավիացիայի մարտական գործողությունները ոչ միայն պետք է շարունակվեն, — նշել է ՌԴ նախագահը, — այլև պիտի ուժեղացվեն այնպես, որ հանցագործները հասկանան, որ հատուցումն անխուսափելի է»:
Վլադիմիրի Պուտինը երկրի պաշտպանության նախարարությանը և զինված ուժերի գլխավոր շտաբին հանձնարարել է սրա վերաբերյալ ներկայացնել առաջարկներ, իսկ արտգործնախարարությանը հանձնարարել է կապվել բոլոր գործընկերների հետ, քանի որ «հանցագործների հայտնաբերելու և պատժելու գործում իրենք հույս են դնում բոլոր բարեկամների վրա»:
Հիշեցնենք, որ Ռուսաստանին պատկանող Airbus A321 ինքնաթիռը Եգիպտոսում՝ Սինայի թերակղզում, վթարվել էր հոկտեմբերի 31-ին: Ինքնաթիռի անկման պատճառով մահացել էին նրա 217 ուղևորները և 7 հոգանոց անձնակազմը: Մինչ այժմ տարբեր մակարդակով վիճարկվում էր ինքնաթիռի անկման պատճառը:
Այսօր՝ նոյեմբերի 17-ին, Եգիպտոսում արդեն ձերբակալվել է Շարմ էլ Շեյխի օդանավակայանի 2 աշխատակից, որոնց կասկածում են պայթուցիկ սարքը ինքնաթիռ անցկացնելու համար: Այս մասին հայտնում է բրիտանական Reuters գործակալությունը:
Այսօր ավելի ուշ Ռուսաստանի անվտանգության դաշնային ծառայությունը տեղեկացրել է, որ ահաբեկիչներին բռնելուն օժանդակող տեղեկությունների տրամադրման դիմաց ծառայությունը խոստանում է վճարել 50 մլն ամերիկյան դոլար դրամական պարգև:
Pingback: ՌԴ օդուժը ԻՊ-ի դիրքերի խոցման համար ներգրավել է ռազմավարական ռմակոծիչներ (վիդեո) | Ռազմ.info
Pingback: ՌԴ օդուժը Սիրիայում ոչնչացրել է ԻՊ-ին պատկանող նավթատար մեքենաներ | Ռազմ.info