Վրաստանի զինված ուժերի գլխավոր շտաբի պետի տեղակալ, բրիգադի գեներալ Վլադիմիր Չաչիբայան նշանակվել է Աֆղանստանում ՄԱԿ-ի առաքելության (United Nations Assistance Mission in Afghanistan — UNAMA) ռազմական ավագ խորհրդատուի պաշտոնում։ Այս մասին այսօր՝ հոկտեմբերի 13-ին, հայտնում է Վրաստանի պաշտպանության նախարարության մամուլի ծառայությունը։
«Մենք 1991 թվականից ակտիվորեն մասնակցում ենք միջազգային առաքելությունների, բայց սա առաջին դեպքն է, որ ՄԱԿ-ի հովանու ներքո առաքելությանը մասնակցում է վրաստանցի բարձրաստիճան սպա։ Սա նորություն է ամբողջ տարածաշրջանի համար։ Այս առաքելությանը ներգրավված է ավելի քան 1600 քաղաքացիական անձ, 2 քաղաքական և 14 ռազմական խորհրդական»,—հայտարարել է Վրաստանի ԶՈւ ԳՇ պետ, գեներալ-մայոր Վախթանգ Կապանաձեն։
Ինչպես նշել է հենց Չաչիբայան, այդ պաշտոնում իր խնդիրն է խորհրատվություն տրամադրել Աֆղանստանում ՄԱԿ-ի գլխավոր քարտուղարի հատուկ ներկայացուցիչ և առաքելության ղեկավար Նիկոլաս Հայսոմին (Nicholas Haysom), ինչպես նաև համակարգել նշված առաքելության և Աֆղանստանի պաշտպանության նախարարության միջև աշխատանքը։
«Ես նաև աշխատելու եմ Աֆղանստանում գտնվող ռազմական կցորդների և կոալիցիոն ուժերի շտաբի հետ։ Ես արտասահմանցի սպաներից կազմված խորհրդականների խումբ եմ ունենալու, որոնց հետ ամեն շաբաթ պատրաստելու ենք տեղում իրավիճակի մասին հաշվետվություն և առաջարկություններ։ Աշխատելու ենք վերլուծության ուղղությամբ և ուղիղ կապ ենք ունենալու ՄԱԿ-ի խաղաղապահ առաքելության դեպարտամենտի հետ»,—հայտնել է Չաչիբայան։
Հայտնի է, որ Վրաստանի ԶՈւ ԳՇ պետի տեղակալն Աֆղանստան կմեկնի առաջիկայում և կծառայի այնտեղ շուրջ 1 տարի։
Տեղեկացնենք նաև, որ 2002 թվականի մարտի 28-ից Աֆղանստանում գործում է ՄԱԿ-ի առաքելությունը (МООНСА/UNAMA—United Nations Assistance Mission in Afghanistan, — UNAMA)։
Հիշեցնենք, որ Վրաստանն այժմ Աֆղանստանում մասնակցում է նաև ՆԱՏՕ-ի «Վճռական աջակցություն» առաքելությանը։ Ինչպես ՆԱՏՕ-ն և Վրաստանն են սիրում նշել, այդ երկիրը ՆԱՏՕ-ի անդամ չլինելով հանդերձ ամենամեծ թվով զինծառայողներն է ուղարկել ու շարունակում ուղարկել Աֆղանստան։ Այդ երկրում առաքելության ողջ ընթացքում այնտեղ սպանվել է 31 վրաստանցի, իսկ ընդհանուր թվով միջազգային առաքելույուններում՝ 36 վրաստանցի։ Մոտ 450 զինծառայող էլ տարբեր աստիճանի մարմնական վնասվածք է ստացել ծառայության ընթացքում։
Pingback: Ռազմաշաբաթ․ Վրաստան․ 11 — 17 հոկտեմբերի, 2015 | Ռազմ.info
Pingback: Վրաստանի ԶՈւ ԳՇ պետի առաջին տեղակալը նշանակվել է ռազմական ակադեմիայի ռեկտորի պաշտոնում | Ռազմ.info
Pingback: Թինա Խիդաշելի. «Վրաստանը պատրաստ է աջակցել ՄԱԿ-ին խաղաղապահ առաքելություններում» | Ռազմ.info