Ռուսաստանի Կասպյան նավատորմիղը հարվածել է Սիրիայում ԻՊ դիրքերին (վիդեո)

Ռուսաստանի Կասպյան նավատորմիղի 4 նավ այսօր՝ հոկտեմբերի 7-ի առավոտյան, թևավոր 26 հրթիռ է արձակել Սիրիայում «Իսլամական պետություն» ահաբեկչական խմբավորման դիրքերին՝ 11 թիրախի ուղղությամբ։ Այս մասին այսօր ՌԴ նախագահ Վլադիմիր Պուտինի հետ հանդիպմանն ասել է ՌԴ պաշտպանության նախարար Սերգեյ Շոյգուն՝ հավելելով, որ բոլոր թիրախները խոցված են, քաղաքացիական անձանց շրջանում զոհեր չկան, հայտնում են ռուսաստանյան լրատվամիջոցները։

ՌԴ ՌԾՈւ-ի «Դաղստան» հրթիռային նավը

«Զինյալներին ոչնչացնելու համար, ավիացիայից բացի, այսօր առավոտյան ներգրավվել է նաև Կասպյան նավատորմիղը։ «Կալիբր» տեսակի թևավոր 26 հրթիռ է արձակվել։ Հարվածների արդյունքում հրթիռները ցույց են տվել իրենց մեծ հեռահարության (շուրջ 1.5 հազար կմ) արդյունավետությունը»,—հայտարարել է Շոյգուն։

Ռուսասատնի պաշտպանության նախարարությունը հաղորդագրություն է տարածել, նշելով, որ գործողությանը ներգրավված են եղել «Դաղստան»,  «Գրադ Սվիյաժսկ» (Град Свияжск), «Ուգլիչ» (Углич), «Վելիկիյ Ուստյուգ» (Великий Устюг) ռազմանավերը։

Նշենք, որ թիրախներին ենթադրաբար հարվածել են «Կալիբր» համալիրի 3М14 թևավոր մեծ հեռահարությայն հրթիռները։ Հատկանշական է, որ այս հրթիռները մինչև վերջերս փորձարկման փուլում էին, հայտարարվում էր, որ փորձարկման փուլում այս հրթիռների հեռահարությունը շուրջ 2800 կմ է եղել։

Հիշեցնենք, որ սեպտեմբերի 30-ից Ռուսաստանը Սիրիայի նախագահ Բաշար Ասադի խնդրանքով սկսել է կետային ավիահարվածներ հասցնել Սիրիայում ԻՊ դիրքերին՝ օգտագործելով Սու-25 գրոհիչներ, Սու-24Մ, Սու-34 ռմբակոծիչներ, իսկ օդային աջակցությունն իրականացնում են Սու-30ՍՄ կործանիչները։

Տեղեկացնենք, որ Ռուսաստանի ներգրավվումը Սիրիայում ընթացող գործողություններին մեծ աղմուկ է բարձրացրել ոչ միայն Արևմուտքում, այլ նաև Եվրոպայում։ Բազմիցս իրենց անհանգստությունն են հայտնել ՆԱՏՕ-ն, ԱՄՆ-ն, Թուրքիան, Գերմանիան, Ֆրանսիան։