Հոկտեմբերի 2-ին ՀՀ ՊՆ վարչական համալիրում ամփոփվել են 2-րդ բանակային զորամիավորման գործունեության արդյունքները: Ներկայացնելով զորամիավորման և ենթակա զորամասերի հրամկազմերի կողմից վերջին շրջանում կատարված հիմնական աշխատանքները, 2-րդ բանակային զորամիավորման հրամանատար, գեներալ-մայոր Պողոս Պողոսյանը փաստել է, որ հաշվետու ժամանակահատվածում պատշաճ մակարդակով անցկացվել են զինանձակազմի մարտական և զորահավաքային պատրաստականության բարձրացմանը միտված, ԶՈւ պատրաստության պլանով նախատեսված միջոցառումները, մարտավարական-մասնագիտական պատրաստության պարապմունքները, շտաբային մարզումներն ու զորավարժությունները։
Գեներալ-մայոր Պողոս Պողոսյանի դիտարկմամբ հակառակորդի դիվերսիոն-հետախուզական խմբերի ներթափանցումը կանխելու նպատակով հաշվետու ժամանակահատվածում մեծածավալ աշխատանքներ են տարվել մարտական հերթապահության կրման պայմանների կատարելագործման, հենակետերի լրակահավորման և ինժեներական բարելավման ուղղությամբ:
Հանդիպման ժամանակ անդրադարձ է եղել նաև սեպտեմբեր ամսվա ընթացքում զինված ուժերի շրջանակում անցկացված ռազմավարական բնույթի միջոցառումների, տարաբնույթ զորավարժությունների արդյունքներին, որոնք ևս մեկ անգամ հավաստել են, որ հայկական զինված ուժերը փոխգործունակ են և ունեն մարտունակության բարձր աստիճան:
Պաշտպանության նախարարի կողմից տրվել են նաև մի շարք հանձնարարականներ` մասնավորապես առաջնագծում տարվող աշխատանքները բարձր մակարդակով շարունակելու, տեղեկատվական անվտանգության և գաղտնիության ռեժիմի նկատառումներից ելնելով մարտական հենակետերում զինծառայողների կողմից բջջային հեռախոսների օգտագործումը, զինծառայողներին հատկացվող պարենամթերքի որակը և տեսականին խիստ վերահսկողության տակ պահելու ուղղությամբ։
Pingback: Ռազմաշաբաթ. Հայաստան․ 27 սեպտեմբերի — 3 հոկտեմբերի | Ռազմ.info