Վրաստանի ՊՆ-ն ու Չեխիան, հնարավոր է, փնտրում են համագործակցության եզրեր

Սեպտեմբերի 7-ին Վրաստանի պաշտպանության նախարարության կիբերանվտանգության բյուրոյի ղեկավար Անդրիա Գոցերիձեն ընդունել է Չեխիայի խորհրդարանի պաշտպանության հանձնաժողովի ղեկավար Դավիդ Կադներին և Չեխիայի պաշտպանության փոխնախարար Թոմաշ Կուչտային։ Այս մասին հայտնում է Վրաստանի պաշտպանության նախարարության մամուլի ծառայությունը։

Վրաստանի կիբերանվտանգության բյուրոյում ընդունել են չեխական պատվիրակությանը

Վրաստանի կիբերանվտանգության բյուրոյում ընդունել են չեխական պատվիրակությանը

Հանդիպմանը ներկա են եղել նաև Վրաստանում Չեխիայի դեսպանն ու ռազմական կցորդը։ Կողմերը քննարկել են կիբերանվտանգության ոլորտում համագործակցության հարցեր։ Նույն օրը չեխական պատվիրակությանն ընդունել է նաև Վրաստանի պաշտպանության նախարարի տեղակալ Բեսիկ Լոլաձեն։ Հանդիպման ժամանակ կողմերը քննարկել են տարածաշրջանում իրավիճակին վերաբերող հարցեր։

Այսօր՝ սեպտեմբերի 8-ին, չեխական պատվիրակությունն այցելել է նաև Վազիանիում տեղակայված 4-րդ մեխանիզացված բրիգադ։ Վերջիններիս ընդունել է Վրաստանի ԶՈւ ԳՇ պետի տեղակալ, գնդապետ Օմար Բեգոիձեն։ Հյուրերին ցուցադրվել են վարժասարքերով հագեցած ուսումնական կենտրոնը և սպառազինության որոշ նմուշներ։ Պատվիրակությունն այցելել է նաև Վրաստանի ԶՈւ ավիաբազաներից մեկը(Ալեքսեևկա):

Վրաստանցի զինծառայողները կրակում են վարժասարքերի օգնությամբ

Վրաստանցի զինծառայողները կրակում են վարժասարքերի օգնությամբ

Տեղեկացնենք, որ հուլիսի 22-ին Վրաստանի պաշտպանության նախարար Թինաթին Խիդաշելին այցելել էր Չեխիա, որտեղ այդ երկրի ռազմաօդային ուժերի հրամանատարի և այլ բարձրաստիճան զինվորականների ուղեկցությամբ այցելել էր «LOM PRAHA», «VR GROUP» և «ERA» ընկերություններ։
Հանդիպումից հետո Խիդաշելին հայտնել էր, որ իրենք ծանոթացել են չեխական ռազմական արտադրությանն ու քննարկել հստակ միջոցառումներ։

«Չեխական կողմը մեզ խոստացել է վրաստանցի օդաչուներին անվճար վերապատրաստել իրենց վարժասարքերով մասնագիտացած կենտրոնում։ Մենք խոսել ենք նաև բանակի կարիքների մասին և հիմա սպասում ենք հստակ առաջարկների»,— հայտնել էր Խիդաշելին։

Ավելի վաղ էլ՝ մարտի 24-ին, Վրաստանի վարչապետ Իրակլի Ղարիբաշվիլին Թբիլիսիում մասնակցել էր զենք արտադրող չեխական «Česká zbrojovka a.s.» (CZ) ընկերության և վրաստանյան «Դելտա» կենտրոնի համատեղ ցուցադրությանը։ Վարչապետին ցուցադրվել էին հրաձգային զենքերը, ինչպես նաև ներկայացվել էր չեխական «Omnipol» ընկերությունը, որը զբաղվում է ռազմական ավիացիոն համակարգերի և սարքավորումների ներմուծմամբ և արտահանմամբ։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *