Սեպտեմբերի 1-ի գիշերը Ռուսաստանի ներքին գործերի նախարարի տեղակալ Վիկտոր Զոլոտովը հանկարծակի ստուգումներ է իրականացրել Չեչնիայի ՆԳՆ հատուկ նշանակության ստորաբաժանումում։ Այս մասին Instagram-ի իր էջում հայտնում է Չեչնիայի ղեկավար Ռամզան Քադիրովը։
Չեչնիայի նախագահ Ռամզան Քադիրովը ստուգումներ անելիս
Նկարը՝ ТАСС գործակալության
Ըստ Քադիրովի՝ Զոլոտովը բարձր է գնահատել հատուկ նշանակության ստորաբաժանման մարտիկների պատրաստությունը, քանի որ վերջիններս, ըստ Քադիրովի, նախատեսված ժամանակից ավելի արագ են բերվել մարտական պատրաստության աստիճանի։
Չեչնիայի նախագահը հայտնել է նաև, որ Ռուսաստանի ներքին գործերի նախարարի տեղակալ Վիկտոր Զոլոտովը խորհրդակցություն է անցկացրել նաև հատուկ նշանակության ստորաբաժանման հրամանատարության հետ, ինչպես նաև ստուգել է հատուկ տեխնիկան, կենտրոնի ուսումնական և կենցաղային պայմանները։
Նշենք, որ վերջին շրջանում Չեչնիայում հաճախակի են ստուգում հատուկ նշանակության գնդի պատրաստության աստիճանը։ Հուլիսի 15-ին Չեչնիայի ղեկավարն ինքն էր մարտական տագնապով ոտքի հանել հատուկ նշանակության ստորաբաժանմանը՝ ստուգելով ուժայինների օպերատիվ-մարտավարական առաջադրանքներ կատարելու հմտությունները։
Ստորաբաժանման պատրաստությունը ստուգելուց հետո Քադիրովը հատկապես շեշտել էր, որ Չեչնիան «չի եղել և չի լինի «Իսլամական պետություն» ահաբեկչական խմբավորման բազա»։
Մեկ շաբաթ անց էլ Չեչնիայի ներքին գործերի նախարար Ռուսլան Ալխանովը ստուգեց ոստիկանության հատուկ նշանակության գնդի մարտական պատրաստության վիճակը։