ԱՄՆ-ն և Գերմանիան դուրս են բերում իրենց Patriot համակարգերը Թուրքիայից

Նախորդ երկու օրերին Գերմանիան, իսկ այնուհետ նաև Միացյալ Նահանգները հայտարարել են, որ մտադիր են առաջիկայում Թուրքիայից դուրս բերել իրենց Patriot զենիթահրթիռային համակարգերը և դրանք շահագործող ստորաբաժանումները:

Գերմանիայի կանցլեր Անգելա Մերկելը Թուրքիայի հարավարևելյան Քահրամանմարաշ գավառում բացազատված գերմանական Patriot զենիթահրթիռային համակարգերի մոտ

Գերմանիայի կանցլեր Անգելա Մերկելը Թուրքիայի հարավարևելյան Քահրամանմարաշ գավառում բացազատված գերմանական Patriot զենիթահրթիռային համակարգերի մոտ

Այսպես, օգոստոսի 15-ին Գերմանիայի պաշտպանության նախարարությունը հայտարարել է, որ 2016-ի հունվարին դուրս է բերելու իր Patriot զենիթահրթռիային համակարգերն ու դրանց անձնակազմերը Թուրքիայից, որտեղ դրանք շահագործվում էին Գերմանիայի նատօյական դաշնակցի՝ Թուրքիայի խնդրանքով՝ երկիրը Սիրիայից և «Իսլամական պետությունից» եկող հավանական վտանգից պաշտպանելու համար: Այս մասին տեղեկացնում է գերմանական Deutche Welle գործակալությունը:

Լրատվամիջոցի հաղորդմամբ՝ հենց 2016-ի սկզբին է ավարտվում գերմանական կողմի ծառայությունը, որի վերաբերյալ պայմանավորվել էին կողմերը: Դրանից հետո Գերմանիան մտադիր է վերանայել իր մասնակցությունը Թուրքիայում Patriot համակարգեր տեղակայելու ծրագրին, քանի որ այն նախ Գերմանիայի համար ծախսատար է, և հետո ծրագրում ներգրավված են գերմանացի լավագույն մասնագետները, ինչն ազդում է գերմանական բանակի մարտունակության վրա:

Գերմանական կողմի հայտարարությունից շատ չանցած՝ օգոստոսի 16-ին, Թուրքիայից իր համակարգերը դուրս բերելու մտադրության մասին է հայտնել նաև ԱՄՆ-ն: Թուրք-ամերիկյան համատեղ հայտարարության մեջ, որը ներկայացված է Թուրքիայի ԱԳՆ կայքում և Թուրքիայում ԱՄՆ դեսպանատան կայքում, նշվում է, որ առաջիկա հոկտեմբերին, երբ վերջանա ամերիկյան Patriot-ների՝ Թուրքիայում ծառայության ժամկետը, կողմերն այլևս չեն թարմացնելու (չեն երկարացնելու) համաձայնությունը, և ամերիկյան համակարգերը դուրս են բերվելու Թուրքիայից:

ԱՄՆ զինված ուժերի Patriot համակարգը և այն շահագործող ամերիկյան ստորաբաժանումը Թուրքիայի հարավային Գազիանթեփ նահանգում

ԱՄՆ զինված ուժերի Patriot համակարգը և այն շահագործող ամերիկյան ստորաբաժանումը Թուրքիայի հարավային Գազիանթեփ նահանգում

Ամերիկյան և գերմանական ստորաբաժանումների դուրսբերումից հետո Թուրքիայում ծառայության մեջ մնալու են միայն Իսպանիայի զինված ուժերի ստորաբաժանումները՝ իրենց Patriot համակարգերով: Սրանք Թուրքիայում տեղակայվել են 2015-ի սկզբին՝ փոխարինելով նիդեռլանդական ստորաբաժանումներին:

Թուրքիայի անվտանգությունն ապահովելու համար նրա նատօյական դաշնակիցները Patriot համակարգերը երկրի հարավային սահմանի մոտ բացազատել էին 2013-ին՝ այն բանից հետո, երբ Թուրքիան դիմել էր ՆԱՏՕ-ին՝ միջին ու մեծ բարձրություններում թիրախներ խոցելու ունակ ՀՕՊ համակարգեր տրամադրելու խնդրանքով:

Նիդեռլանդները 2014-ին հայտարարել էր, որ 2015-ի հունվարին իր ՀՕՊ համակարգերը վերանորոգելու և սպասարկելու նպատակով դուրս է բերելու Թուրքիայի տարածքից, իսկ վերջիններիս փոխարեն սեպտեմբերին առաքելությանը միանալու պատրաստակամություն էր հայտնել Իսպանիան: ԱՄՆ-ն և Գերմանիան իրենց մարտկոցները շարունակում էին պահել Թուրքիայում մինչև հիմա:

Նշենք, որ հենց Թուրքիան Patriot համակարգեր չունի իր սպառազինության մեջ: Դրանք գնելու որոշակի հավանականություն կար այն ժամանակ, երբ թուրքական կողմը ՀՕՊ համակարգերի ձեռքբերման մրցույթ էր հայտարարել, որին մասնակցում էին նաև Patriot-ները: Սակայն թուրքերը նախ մրցույթի հաղթող ճանաչեցին Չինաստանի արտադրած HQ-9 համակարգերը (Ս-300-ի չինական կրկնօրինակ), հետո ՆԱՏՕ-ի ճնշման տակ չեղյալ հայտարարեցին իրենց որոշումը: ՆԱՏՕ-ն իր ճնշումները պատճառաբանում էր նրանով, որ չինական ՀՕՊ համակարգը չի կարող ինտեգրվել Թուրքիայում ներդրված նատօյական ընդհանուր ՀՕՊ համակարգին: Սակայն պարզից պարզ է, որ ՆԱՏՕ-ին ավելի շահավետ կլիներ, որ Թուրքիան գումարը ծախսեր ամերիկյան արտադրության համակարգեր գնելու վրա, ոչ թե չինական:

Ս-300 ԶՀՀ-ի չինական կրկնօրինակ՝ HQ-9 ԶՀՀ

Ս-300 ԶՀՀ-ի չինական կրկնօրինակ՝ HQ-9 ԶՀՀ

Հետագայում՝ փետրվարին, Թուրքիան հայտարարեց, որ ընդհանրապես սառեցնում է մրցույթը մինչև ապրիլի 24-ը (2015թ.), որպեսզի տեսնի, թե Հայոց ցեղասպանության 100-ամյակին ինչպիսի արձագանք կլինի ԱՄՆ-ից և Ֆրանսիայից (Թուրքիայի ՀՕՊ համակարգերի մրցույթին մասնակցում էր նաև ֆրանսիական արտադրության Samp/T համակարգը): Ներկայում, սակայն, ՀՕՊ համակարգերի գնման մրցույթի մասին խոսակցությունները դադարել են, և հայտնի չէ, թե թուրքական կողմն ի վերջո ինչ է որոշել:

Ավելացնենք, որ ամերիկյան արտադրության Patriot համակարգերը նախատեսված են միջին ու մեծ բարձրություններում հակաօդային պաշտպանության ապահովման, ինչպես նաև հակառակորդի բալիստիկ հրթիռների ոչնչացման համար։ Արտադրությունը սկսվել է 1976 թվականին, իսկ ԱՄՆ սպառազինության մեջ ընդգրկվել է 1981-ին։ Patriot հրթիռային համակարգեր կան աշխարհի 10-ից ավելի երկրների սպառազինությունում։

3 responses to “ԱՄՆ-ն և Գերմանիան դուրս են բերում իրենց Patriot համակարգերը Թուրքիայից

  1. Pingback: Ռազմաշաբաթ. Թուրքիա. 16-22 օգոստոսի, 2015 | Ռազմ.info

  2. Pingback: Իսպանիան Patriot-ները կպահի Թուրքիայում, քանի դեռ ՆԱՏՕ-ն հակառակը չի պահանջել | Ռազմ.info

  3. Pingback: Գերմանական Patriot-ները դուրս են բերել Թուրքիայից | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *