Մեծ Բրիտանիայի ՌՕՈւ-ն փորձարկելու է իր A400M բեռնատար ինքնաթիռները

Մեծ Բրիտանիայի ռազմաօդային ուժերը հուլիսի վերջին սկսելու են երկրի սպառազինության մեջ եղած Airbus A400M Atlas բեռնատար ինքնաթիռների փորձարկումներ։

Ինքնաթիռներից բացի, շահագործման հնարավորությունները հստակեցնելու նպատակով հուլիսի վերջից մինչև 2018թ-ի մարտ փորձարվելու են նաև երկրի սպառազինոթյան պարաշյուտային և այլ համակարգերը: Այս մասին հուլիսի 2-ին նշել է բրիտանական խորհրդարանի՝ ռազմական գնումների հանձնաժողովի փոխքարտուղարը, հայտնում է բրիտանական Janes ռազմական հանդեսը։

A400M բեռնատար ինքնաթիռ

A400M բեռնատար ինքնաթիռ

Մեծ Բրիտանիան իր պատվիրած 22 A400M Atlas ինքնաթիռներից մինչև հիմա ստացել է միայն 2-ը, ևս 4-և Իսպանիայի Սևիլիա քաղաքում նախնական փորձարկում են անցել։ Դրանք նախատեսված էր շահագործման հանձնել դեռևս մարտին, բայց ըստ նույն աղբյուրի՝ ժամկետը հետաձգվել է մինչև 2015-ի սեպտեմբեր։ Այս հետաձգումների պատճառը կարող է լինել նաև 2015թ. մայիսին Սևիլիայում Թուրքիայի զինված ուժերի համար նախատեսված նմանատիպ ինքնաթիռի վթարը։

Խնդիրն այն է, որ մայիսի 9-ին թուրքական օդուժի համար նախատեսված A400M բեռնատար ինքնաթիռն Իսպանիայում վթարվել էր փորձարկումների ժամանակ: Վթարի հետևանքով անձնակազմի 4 անդամները զոհվել էին։ Դեպքից հետո Թուրքիայի ռազմաօդային ուժերի հրամանատարի հրամանով դադարեցվել էր երկրի զինված ուժերում եղած 2 միավոր A400M բեռնատար ինքնաթիռների շահագործումը։

Հավանական է, որ այս վթարից հետո են բրիտանական իշխանությունները որոշել կրկին փորձարկել իրենց զինված ուժերի սպառազինության մեջ եղած բեռնատար ինքնաթիռները:

Ավելացնենք, որ A400M Atlas բեռնատար ինքնաթիռը արտադրում է եվրոպական Airbus Military ընկերությունը։ Այն կարող է տեղափոխել մինչև 37 տոննա բեռ կամ 116 հոգանոց անձնակազմ, ինչպես նաև օդում լիցքավորել այլ ինքնաթիռներ։ Այն կարող է զարգացնել մինչև 790 կմ/ժ արագություն, թռիչքներ կատարել մինչև 9300 կմ հեռավորության վրա:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *