ԱՄՆ պաշտպանության քարտուղար Էշթոն Քարթերը հունիսի 23-ին ՆԱՏՕ-ի անդամ երկրների պաշտպանության նախարարների համաժողովի շրջանակներում հանդիպել է իր կանադացի գործընկերոջը՝ Ջասսոն Կեննեյին և քննակել Ուկրիանական ճգնաժամի հաղթահարմանը խոչընդոտող խնդիրները, երկկողմ և ՆԱՏՕ-ի աջակցման ծրագրերի շրջանակներում ուկրաինական կառավարական ուժերին՝ ապստամբների դեմ պայքարում օժանդակելու հարցերը, ինչպես նաև «Իսլամական պետություն» ահաբեկչական կազմակերպության դեմ համատեղ պայքարը Սիրիայում և Իրաքում ու Կանադա-ԱՄՆ ռազմական համագործակցության ձերքբերումները և հեռանկաները: Այս մասին հայտնում է Պենտագոնի կայքը:
Դեռևս ապրիլին Կանադայի վարչապետ Սեֆան Հարփերը հայտարարել էր, որ իրենք պատրաստվում են այս տարվա օգոստոսին 200 հոգանոց զինվորական անձնակազմ ուղարկել Ուկրաինա՝ մարզելու ապստամբների դեմ պայքարող ուկրաինական կառավարական բանակին: Հունիսի 18-ին Հարփերն Ուկրաինայի նախագահ Պյոտր Պորոշենկոյի հետ հեռախոսազրույցի ժամանակ հայտարարել է, որ որոշումն ուժի մեջ է, իրենք շարունակելու են աջակցել ուկրաինական կառավարությանը, և այդ անձնակազմն Ուկրիանայում է մնալու մինչև 2017-ի մարտի 31-ը: Վերջիններս ԱՄՆ հրահանգիչների հետ համատեղ մարզումներ ու մարտավարական վարժանքներ են անցկացնելու նաև Ուկրաինայի ազգային գվարդիայի համար:
ՆԱՏՕ-ն, իր հերթին, Ուկրաինային աջակցելու նպատակով պատրաստվում է նոր նպատակային հիմնադրամ բացել՝ Ուկրաինայում ականազերծման և ինքնաշեն պայթուցիկ նյութերի պաշտպաության կազմակերպման նպատակով, այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը:
Նշենք, որ ԱՄՆ-ի և Մեծ Բրիտանիայի հրահանգիչներն արդեն սկսել են մարզել ուկրիանական կառավարական բանակը, Լեհաստանի հրահանգիչների 50 հոգանոց անձնակազմը Ուկրիանայում մարզումներն անցկացնելու է հունիս, սեպտեմբեր և հոկտեմբեր ամիսներին, իսկ ԱՄՆ Կոնգրեսը ռազմական բյուջեի փոփոխությունների մասին օրենքի նախագծի մեջ ներառել է Ուկրաինայի կառավարությանը մահաբեր զենք, այդ թվում՝ հակատանկային համակարգեր, ականանետներ ու նռնականետներ տրամադրելու հարցը՝ որպես աջակցություն ապստամբների դեմ պայքարում:
Հատկանշական է, որ մինչ ՆԱՏՕ-ի անդամ երկրները շարունակում են ծրագրեր մշակել ուկրիանական բանակը զինելու և զինծառայողներին մարզելու վերաբերյալ, «Նորմանդական քառյակի» պետությունները փորձում են բանակցությունների միջոցով խաղաղ լուծումներ գտնել` Ուկրիանայում ստեղծված հակամարտությունը հաղթահարելու համար:
Հիշեցնենք, որ Ուկրաինայում քաղաքացիական պատերազմը սկսվել է 2014-ի գարնանը: Ճգնաժամը հաղթահարելու նպատակով 2015-ի փետրվարի 11-12-ին Մինսկում կայացան բանակցություններ, որոնց մասնակցում էին Ֆրանսիայի նախագահ Ֆրանսուա Օլանդը, Գերմանիայի կանցլեր Անգելա Մերկելը, Ռուսաստանի և Ուկրաինայի նախագահներ Վլադիմիր Պուտինն ու Պյոտր Պորոշենկոն: Վերոնշյալ բանակցությունների արդյունքում որոշվել էր փետրվարի 15-ին՝ Կիևի ժամանակով ժամը 00:00-ին, հայտարարել հրադադար։ Սակայն զինադադարի հայտարարումով ռազմական բախումներին Ուկրաինայի արևելքում վերջ չդրվեց։
Ավելացնենք, որ ԱՄՆ-ն և ԵՄ-ն Ուկրաինայում իրավիճակի լարվելուց հետո բազմիցս մեղադրել են Մոսկվային՝ ապստամբներին աջակցելու և զինելու համար, ինչը, սակայն, ՌԴ իշխանությունները հերքել են՝ նշելով, որ իրենք ներքաղաքական հակամարտությունում կողմ չեն: