Ադրբեջանում ԱՄՆ դեսպան Ռոբերթ Սեքութան ապրիլի 14-ին այցելել է Ադրբեջանի ռազմաօդային ուժերի՝ Քյուրդամիրում տեղակայված ավիաբազա, որտեղ հանդիպել է ռազմական օդաչուներին։ Այս մասին հայտնի է դարձել Բաքվում ԱՄՆ դեսպանատան ֆեյսբուքյան պաշտոնական էջից։
Գրառման մեջ նշվում է, որ այցի ընթացքում դեսպանին հնարավորություն է տրվել Սու-25 գրոհիչի օդաչուական խցիկում ծանոթանալ ինքնաթիռին, որից հետո փորձել օդաչուական հմտությունները վարժասարքի վրա։
Ապրիլի 15-ին Ռոբերթ Սեքութան այցելել է նաև Գյոյգյոլի շրջանում տեղակայված՝ Ադրբեջանի ականազերծման ազգային գործակալության (ANAMA) ուսումնական կենտրոն, որտեղ ծանոթացել է ԱՄՆ ֆինանսական օժանդակությամբ ձեռք բերված ականազերծման միջոցներին և մինչ օրս գործակալության կատարած աշխատանքների ծավալներին։
Հավելենք, որ Ռոբերթ Սեքութան Ադրբեջանում ԱՄՆ դեսպանի պարտականությունները ստանձնել է 2015-ի փետրվարի 12-ից։