ՌԴ նախագահի հրամանագրով հանվել է Ս-300 ԶՀՀ-ների տրամադրման արգելքն Իրանին

Ռուսաստանի նախագահ Վլադիմիր Պուտինը ստորագրել է հրամանագիր, որի համաձայն հանվում է ՌԴ տարածքով Ս-300 զենիթահրթիռային համակարգերի՝ Իրան արտահանման արգելքն ու դրանց փոխանցումն այդ երկրին։ Այս մասին ապրիլի 13-ին հայտնում է ռուսաստանյան «ՌԻԱ Նովոստի» լրատվական գործակալությունը՝ հղում անելով Կրեմլի մամուլի ծառայության տարածած հաղորդագրությանը։

Ռուսաստանյան արտադրության Ս-300ՎՄ «Անթեյ-2500» ՀՕՊ զենիթահրթիռային համակարգ

Հրամանագրի տեքստում նշվում է, որ հանվում է արգելքը՝ Ս-300 ԶՀՀ-ների՝ ՌԴ տարածքով փոխադրումն Իրան՝ այդ թվում օդային ճանապարհով, ինչպես նաև Ռուսաստանի տարածքից դուրս՝ այլ եկրների ծովային և օդային ճանապարհով՝ ՌԴ դրոշի ներքո։

Հիշեցնենք, որ Իրանն ու Ռուսաստանը Ս-300 զենիթահրթիռային համակարգերի  գնման պայմանագիրը կնքել են դեռևս 2007-ին: Ըստ պայմանագրի, համակարգերի համար Իրանը վճարելու էր մոտ 800 մլն ամերիկյան դոլար։ Սակայն 2010-ին ՄԱԿ-ը ընդլայնեց պատժամիջոցներն Իրանի նկատմամբ, որով արգելվեց որոշ զինատեսակների մատակարարումն Իսլամական Հանրապետությանը։

Վերոնշյալ սահմանափակումները վերաբերում էին նաև Ս-300 ԶՀՀ-ին, ինչի պատճառով Ռուսաստանը կասեցրեց պայմանագրի կատարումը։ Փոխարենը, Իրանին առաջարկվեց է Ս-300 ԶՀՀ-ի փոխաերն գնել նույն համակարգի «Անթեյ-2500» (Ս-300ՎՄ) մոդիֆիկացիան։

Իրանը, սակայն, չհամաձայնելով առաջարկին, «Ռոսօբորոնէքսպորտի» դեմ 4 մլրդ դոլարի հայց ներկայացրեց Ժնևի միջազգային արբիտրաժային դատարան։

Ավելացնենք, որ հակաօդային պաշտպանության Ս-300ՎՄ «Անթեյ-2500» զենիթահրթիռային համակարգերն ունակ են ոչնչացնել մինչև 4500մ/վ արագությամբ շարժվող թիրախներ մինչև 200-250կմ հեռավորության վրա (կախված թիրախի տեսակից): Համակարգի արձակած մեկ հրթիռով հակառակորդի բալիստիկ հրթիռի խոցման հավանականությունը գնահատվում է 40-70 տոկոս, ինքնաթիռի դեպքում հավանականությունը հասնում է մինչև 90 տոկոսի։