Թուրք ռազմական մասնագետներն Իրաքի հյուսիսում շուրջ մեկ ամիս է մարզում են ԻՊ դեմ պայքարող փեշմերգեի 230 մարտիկ: Տեղեկությունը հաղորդել է Թուրքիայի ԱԳՆ բարձրաստիճան պաշտոնյաներից մեկը՝ հավելելով, որ նմանատիպ մարզումները շարունակական են լինելու, քանի դեռ անհրաժեշտություն կա:Այս մասին հայտնում է թուրքական «Հյուրիյեթ դեյլի Նյուզ» պարբերականը:
Քրդական անվտանգության ուժերի և Իրաքի զինված ուժերի զինվորները Բաղդադի հյուսիսում: Աղբյուր՝ REUTERS
Տեղեկատվությունը հաստատել է նաև Հյուսիային Իրաքի Քրդական Ինքնավարության խորհրդարանական գործերով նախարար Մավլուդ Բավամուրադը՝ նշելով, որ վարժանքները միտված են կատարելագործել քուրդ մարտիկների՝ զենքին տիրապետելու հմտությունները:
Բավամուրադն անդրադարձել է նաև Թուրքիայի վարչապետ Դավութօղլուի Իրաք կատարած այցին, որի ընթացքում վերջինս եղել է նաև Քրդական մարզում՝ Էրբիլի մոտ գտնվող Բափիշտան ճամբարում: Այցի ժամանակ Դավութօղլուն նշել է, որ Թուրքիան պատրաստ է աջակցել քրդական ուժերին անվտանգության ապահովման հարցում:
Նշենք, որ անցնող 2 ամիսներին Իրաքի քրդերը մեծաքանակն սպառազինություն և ռազմական նշանակության սարքավորումներ են ստացել Արևմտյան դաշնակիցներից, իսկ Գերմանիան ու Բրիտանիան փեշմերգե զորաջոկատներին վարժեցնում են հակատանկային զինատեսակների օգտագործման և ականազերծման գործում։
Հիշեցնենք, որ Թուրքիան և ԱՄՆ-ն համաձայնության են եկել Անկարայից 150 կմ հեռավորության վրա գտնվող Քրշեհիր քաղաքի «Հիրֆանլը» կենտրոնում անցկացնել համատեղ վարժանքներ՝ «Սիրիայի ազատ բանակ» խմբավորման շուրջ 2000 զինյալների համար: Վերջիններիս պայքարը ևս ուղղվելու է ԻՊ դեմ:
Pingback: Թուրքիայի երկակի քաղաքականությունը «Իսլամական պետության» նկատմամբ | Ռազմ.info
Pingback: Թուրքիան ռազմական գույք է մատակարարել ԻՊ դեմ կռվող Փեշմերգեի ուժերին | Ռազմ.info