Նոյեմբերի 18-ին Վրաստանում ավարտվել է հրամանատարաշտաբային «Դիդգորի 2014» զորավարժությունը։ Ամփոփիչ հավաքը կայացել է պաշտպանության նախարարությունում։ Զորավարժության հիմնական նպատակն է ռազմաքաղաքական իրավիճակի սրման պայմաններում պետական և ռազմական կառավարման մարմինների աշխատանքի ներդաշնակվածության մակարդակի բարձրացումն ու ինչպես նաև Վրաստանի ԶՈւ շտաբների պատրաստումը։
Այս մասին հայտնում է Վրաստանի պաշտպանության նախարարությունը։
Վրաստանի ԶՈւ ԳՇ պետը (ձախից) «Դիդգորի-2014» հրամանատարաշտաբային զորավարժության ամփոփման ժամանակ
Վարժանքների ընթացքում մասնակիցները գործել են պայմանական առաջադրանքի համաձայն։ Առաջիկայում նախատեսվում է ներգրավված բոլոր խմբերի հետ հանդիպում կազմակերպել, վերլուծել և գնահատել իրականացված զորավարժությունը։
«Դիդգորի 2014» զորավարժությանը, որը մեկնարկել էր նոյեմբերի 13-ին «Կրցանիսի» ուսումնական կենտրոնում մասնակցել են զինված ուժերի մի շարք ստորաբաժանումներ, ինչպես նաև ներքին գործերի նախարարության զինված ստորաբաժանումները։ Վարժանքներին դիտորդի կարգավիճակով ներկա են եղել նաև ԱՄՆ-ից 29 զինծառայող:
Բացման արարողությանը ներկա է եղել Վրաստանի պաշտպանության նախարար Մինդիա Ջավելիձեն, զինված ուժերի գլխավոր շտաբի պետ, գեներալ-մայոր Վախթանգ Կապանաձեն և գլխավոր շտաբի մի շարք բարձրաստիճան զինվորականներ։
Զորավարժությունն ընթացել է «Կրցանիսի» ուսումնական կենտրոնում, «Վազիանի» և «Սենակի» ռազմաբազաներում։
Նախատեսվում է հաջորդ տարի անցկացվելիք զորավարժությունն իրականացնել խոշոր մասշտաբներով և ներառել մյուս նախարարություններին։