Նոյեմբերի 15-ից հայկական զինված ուժերը կանցնեն նոր նմուշի դաշտային ձմեռային համազգեստի։ Թե ինչ փոփոխություններ ու առավելություներ ունի նոր համազգեստը Ռազմինֆոյի հետ զրույցում պատմում է զինված ուժերի թիկունքի վարչության իրային ծառայության պետ, փոխգնդապետ Վահան Պապյանը։
«Նոր ձմեռային համազգեստն արտաքինից ոչնչով չի տարբերվում ներկայիս դաշտային ձմեռային համազգեստից, փոխարենը տարբերվում է որակական հատկանիշներով։ Տաքացնող շերտը մշակված է սինտեպոնով, երկկողմանի մեմբրանային կտորով, ինչն էլ տաք պայմաններ է ստեղծում մարմնի համար և խոչընդոտում է ցրտի ներթափանցմանը։ Այսինքն նոր համազգեստը ջերմամեկուսիչ է։ Բացի այդ, շատ թեթև է, հարմարավետ բոլոր իրավիճակներում»,- ներկայացնում է փոխգնդապետ Պապյանը։
Բաճկոնի մեջքին՝գոտկատեղի հատվածում, քամուց պաշտպանող էլաստիկ ժապավենով գոտի կա, որը չի թողնում սառը օդը ներթափանցի գոտկատեղից վեր, իսկ թևքերին դեպի դաստակ ներսից ամրացված են տրիկոտաժե մանժետներ, որոնք ունեն բթամատերի համար հատուկ տեղեր՝ որոնք էլ կարող են ձեռնոց դառնալ զինծառայողի համար։
Խոսելով նոր նմուշի առավելությունների մասին՝ փոխգնդապետը ներկայացրեց նոր անջրանցիկ կտորից գլխաշորը (կապյուշոն), որը զինծառայողներին պաշտպանելու է անձրևից և ձյունից։
«Փոփոխված է նաև ձմեռային տաբատը, այն նույնպես մշակված է սինտեպոնից, ավելի թեթև և տաք է։ Կարող է պաշտպանել մինչև -40 աստիճան ցրտի պայմաններում»,- վստահեցնում է Վահան Պապյանը։
Ավելի հարմարավետ է դարձել նաև ձմեռային գլխարկը։ Այն շատ թեթև է, տաք ու հարմար է ականջները ցրտից պաշտպանելու համար։
Այն հարցին, թե ինչ նորամուծություններ կլինեն առաջիկայում, փոխգնդապետը նշեց, որ ամեն ինչ կապված է ժամանակի հետ, բայց որ ամեն ինչ փորձելու են հնարավորինս կատարելագործել՝ հաստատ է։
«Դեռևս փորձարկման փուլում են նաև նոր ճտքավոր կոշիկների նմուշները։ Դրական արդյունքի դեպքում համազգեստին կավելանա նաև դա»,- հավաստում է զինված ուժերի թիկունքի վարչության իրային ծառայության պետը:
Բացի ձմեռային համազգեստից, փոփոխություններ սպասվում են նաև սպայակազմի ամառային համազգեստներում, բայց ինչպես Վահան Պապյանն է նշում՝ դա էլ առաջիկայում։