Լեհաստանի փրկարար ծառայության ինքնաթիռը 2014-ի օգոստոսի 20-ին խախտել է ՌԴ օդային սահմանը Կալինինգրադի շրջանում։ Սահմանախախտ ինքնաթիռը շուրջ 150 մետր խորությամբ մտել է Ռուսաստանի օդային տարածք, սակայն միջադեպը լուրջ հետևանքներ չի ունեցել, քանի որ Վարշավայից ռուսաստանյան կողմին նախօրոք տեղեկացրել էին այդ շրջանում իրենց ինքնաթիռի թռիչքների մասին։ Տեղեկությունը հաղորդում է ռուսաստանյան «ՌԻԱ-Նովոստի» լրատվական գործակալությունը՝ հղում անելով երկրի անվտանգության դաշնային ծառայության սահմանապահ ծառայությանը։
Նշվում է, որ Բալթիկ ծովի շրջանում Լեհաստանի փրկարար ինքնաթիռը կատարում էր որոնողական աշխատանքներ և դրա ողջ ընթացքում այն եղել է ՌԴ համապատասխան ծառայությունների և ստորաբաժանումների հսկողության տակ։
Միջադեպի մասին շտապել է տեղեկացնել նաև լեհական կողմը՝ նախ Կալինինգրադի մշակութային կենտրոնի տարածած հաղորդագրության միջոցով, որին քիչ անց հաջորդել է նաև Լեհաստանի ազգային անվտանգության նախարարության ներկայացուցչի թվիթերյան գրառումը, որում նշված է՝ ՌԴ-ն նախօրոք զգուշացված էր մերձսահմանային գոտում լեհական ինքնաթիռի որոնողական աշխատանքների մասին։ Նշենք, սակայն, որ գրառման մեջ չի հստակեցվում, թե ստույգ ինչ էր որոնում ինքնաթիռը։
Նկատենք, որ միջադեպը հարթվել է շատ արագ և հետևանքներ՝ ի թիվս որևէ գերատեսչություն կտրուկ հայտարարության, չի ունեցել՝ հակառակ լարված միջպետական հարաբերություններին, որոնք առկա են ՌԴ-ի և Լեհաստանի միջև։