Գազայի հատվածում ռազմական ակտիվ գործողությունների արդյունքում Իսրայելը կարողացավ «ցուցադրել» իր սպառազինության մի շարք տարատեսակներ ու գովազդել դրանք արտահանման նպատակով:
Հակամարտության ընթացքում, ըստ իսրայելական կողմի, իրեն արդարացրեց տեղական արտադրության Iron Dome հակահրթիռային պաշտպանության համակարգը, որը Haaretz պարբերականի տվյալներով 90 տոկոս արդյունավետություն ցույց տվեց:
Ըստ համակարգն արտադրող Rafael ընկերության ղեկավար Յեդիդիա Յաարիի (Yedidia Yaari)՝ նման արդյանավետությամբ աշխատող հակահրթիռային համալիրը հետաքրքրել է Կորեայի Հանրապետությանը (Հարավային Կորեա), ինչից հետո իսրայելցի մասնագետները մեկնել են Սեուլ՝ կորեական կողմի հետ բանակցություններ սկսելու նպատակով:
Պաշտոնյան որևէ հստակ տեղեկություն չի տվել բանակցությունների ընթացքի մասին, սակայն հայտնել է, որ Հարավային Կորեան պետք է մտցնել համակարգով հետաքրքրվող երկրների «ակումբի» մեջ:
Նշենք, որ նմանատիպ հայտարարություններ վերջերս եղան նաև զրահատեխնիկայի ակտիվ պաշտպանության Trophy համակարգի վերաբերյալ: Իսրայելական կողմը նշում էր, որ համակարգը լավ է դրսևորել իրեն ռազմական գործողությունների ժամանակ ու մի քանի անգամ փրկել է տանկերը հակատանկային կառավարվող հրթիռներից:
Ավելացնենք, որ իսրայելական Iron Dome հակահրթիռային պաշտպանության համակարգը նախատեսված է հակառակորդի չկառավարվող հրթիռների հայտնաբերման ու ոչնչացման համար: Համակարգը հայտնաբերում ու սեփական հրթիռներով ոչնչացնում է հակառակորդի՝ 4-ից 70 կմ հեռավորությունից արձակված չկառավարվող հրթիռներն ու արկերը: Համակարգը զինված է 90 կգ զանգվածով և 1,6 մ տրամագծով հրթիռներով, որոնց վրա էլ տեղադվրած են նշանառման հրթիռները։
Հակահրթիռային պաշտպանության համակարգի մեկ մարտկոցի գինը մոտ 50 մլն ամերիկյան դոլար է, իսկ յուրաքանչյուր հրթիռի գինը՝ 30 հազարից 50 հազար դոլար:
Iron Dome-ի նախագծումը սկսվել է 2005-ին, իսկ սպառազինության այն ընդունվել է 2011-ին: Մինչ այժմ համակարգը կիրառվում է միայն Իսրայելի զինված ուժերում (առկա է 9 մարտկոց ևս 15 մարտկոց նախատեսվում է մատակարարել): Մի շարք երկրներ հետաքրքրվել են համակարգով, սակայն արտահանման մասին տեղեկություններ դեռ չկան: