Այսօր՝ հունիսի 23-ին, Հայաստանի Էրեբունի ռազմական օդանավակայանում նշվեց ՀՀ ԶՈւ ավիացիայի օրը։ Հանդիսավոր միջոցառմանը պարգևատրվեցին ծառայության ընթացքում աչքի ընկած զինծառայողներ, որից հետո երկինքը «տրամադրվեց» հյուրերին։
Միջոցառմանը բարձրագույն պիլոտաժի հնարքներ ցուցադրելու համար Հայաստան էին ժամանել ռուսաստանյան «Ստրիժի» ավիացիոն խմբի օդաչուները, ովքեր Էրեբունի ավիաբազայի ՌԴ ԶՈւ ՄիԳ-29 կործանիչներով ներկայացրին մի շարք հնարքներ։
Իսկ մինչև ռուսաստանցի օդաչուները պատրաստվում էին երկինք բարձրանալ, Երևանի երկնքում ՀՀ ԶՈւ Սու-25 գրոհիչները պատկերեցին հայկական եռագույնը, որից հետո հերթափոխն ընդունեց Յակ-52 ուսումնամարտական ինքնաթիռը։
Հավելենք, որ հասարակությանն էր ներկայացված Մի-2, Մի-8, Մի-24 ուղղաթիռները, ինչպես նաև ռուսաստանյան ավիաբազայի ՄիԳ-29 կործանիչները։
Ավիացիոն խմբի ցուցադրությունից հետո երկնքում հայտնվեցին պարաշյուտիստները Հայաստանի, Ռուսաստանի դրոշներով։
«Մեզ համար հաճելի էր ու մեծ պատիվ, որ հրավիրել էին մեր ընկերների համար ելույթ ունենալ։ Թռել ենք ձեզ համար։ Դուք տեսել եք այն բոլոր հնարքները, որոնք մենք մեր թռիչքներում ներառում ենք։ Այսօր ոչ մի բացառություն չի եղել»,- թռիչքներից հետո լրագրողների հետ զրույցում նշեց ավիացիոն խմբի օդաչուներից մեկը։
Իսկ ՀՀ-ում ՌԴ ավիաբազայի հրամանատար Ալքեսանդր Պետրովը, ով այսօր ղեկավարում էր թռիչքները նշեց, որ եթե մի տեղ ելույթ է ունենում «Ստրիժի» խումբն արդեն տոն է։
«Հույս ունենք, որ սեպտեմբերի 21-ին՝ ՀՀ Անկախության օրը կկարողանանք Հայաստան հրավիրել «Վիտյազի» և «Ստրիժի» ավիացիոն խմբերին»,- հավելեց ՀՀ-ում ՌԴ ավիաբազայի հրամանատար Ալքեսանդր Պետրովը։