ՀՀ նախագահ Սերժ Սարգսյանը հունիսի 21-ին Երևանի Դավթաշեն վարչական շրջանում ներկա է եղել ՀՀ ոստիկանության զորքերի նոր վարչական շենքի բացման արարողությանը:
Ցուցադրական վարժություններ. ՀՀ ոստիկանության զորքեր
Միջոցառումը համընկնում էր ոստիկանության զորքերի կազմավորման 22-րդ տարեդարձի օրվան: ՀՀ նախագահը շրջել է երկհարկանի հիմնանորոգված շենքում, ծանոթացել իրականացված աշխատանքներին, ստեղծված աշխատանքային պայմաններին:
Վարչական շենքն ունի ժամանակակից, կահավորված աշխատասենյակներ, դահլիճ, ուսումնական և ցուցադրական սրահներ, որոնք հագեցած են նոր սերնդի տեխնիկայով, ծառայության պայմանները դյուրին դարձնելու և աշխատանքը ժամանակի պահանջներին համահունչ կազմակերպելու անհրաժեշտ միջոցներով:
ՀՀ ոստիկանության զորքերի վարչական շենքն ու տեխնիկան
Սարգսյանն այցելել է նաև վարչական նոր շենքում բացված ոստիկանության զորքերի անցած ճանապարհն ընդհանրացնող թանգարան, որն առաջիկայում կհարստացվի մարտական ուղի անցած և զոհված զինծառայողների հիշատակը հավերժացնող վկայություններով ու պատմական նմուշներով:
Նախագահ Սերժ Սարգսյանը ոստիկանության զորքերի կազմավորման 22-րդ տարեդարձի առթիվ շնորհավորել և արդյունավետ ծառայություն է մաղթել ոստիկանության զորքերի հրամանատարությանն ու ողջ անձնակազմին: