Իսրայելական զինուժը հարվածային անօդաչուի կիրառմամբ ռմբակոծել է Գազայի հատվածը, ինչի հետևանքով վիրավորվել է երկու մարդ։ Իսրայելական կոմղը հանդես է եկել հայտարարությամբ և պնդել, որ օդային հարվածի թիրախը ահաբեկիչներն էին, ովքեր հրթիռային հարված էին նախապատրաստում Իսրայելի վրա։ Այս մասին հաղորդում էAssociated Press գործակալությունը։
Նշենք, որ սա վերջին օրերի միակ գործողությունը չէ, որն ուղղված է ահաբեկիչ-գրոհայինների դեմ։ Հունվարի 8-ին Գազայի հատվածում պայթյունի հետևանքով սպանվել է «Իսլամական ջիհադ» խմբավորման անդամ գրոհայիններից մեկը, սակայն Իսրայելը հայտարարել է, որ որևէ առընչություն չունի պայթյունին։
Հիշեցնենք, որ վերջին շաբաթներին իրավիճակը Գազայի հատվածում ընդունել է համեմատաբար լարված բնույթ։ Իսրայելի օդուժի հասցրած հարվածների և պաղեստինյան կողմի պատասխան գործողությունների հետևանքով Գազայի հատվածում զոհվել է 5, վիրավորվել շուրջ 10 մարդ։ Իսրայելական կողմը ևս ունի մեկ զոհ։
Հիշեցնենք նաև, որ Իսրայելի կողմից 2012-ի նոյեմբերի 14-ին մեկնարկած ութօրյա ռազմական գործողության արդյունքում Գազայի հատվածը ղեկավարող ՀԱՄԱՍ խմբավորման և իսրայելական կողմի միջև ձեռքբերվեց հրադադարի սահմանման պայմանավորվածություն, որից հետո փոխհրաձգությունները հակամարտող կողմերի միջև կրում են համեմատաբար եզակի բնույթ։