Այսօր մամուլի ուշադրության կենտրոնում են եղել բանակում առկա ոչ կանոնադրային հարաբերությունները և դրանց հետևանքները: Շարունակվել և դահլիճում անկառավարելի աղմուկի պատճառով մեկ օրով հետաձգվել է Արտակ Նազարյանի մահվան գործով դատավարությունը: Ռազմական փորձագետներն անդրադարձել են Ադրբեջանի հետագա՝ հավանական քայլերին:
- «…Այն խնդիրները, որ հիմնականում լինում են, նրանից է, որ բանակում ծառայողների մի մասն այնպիսի խավից են, որ նրանց համար մարդու չափանիշները, իդեալները մի քիչ այլ են։… Փոխանակ երեխային ասելու` քարը վերցրու ու տուր ընկերոջդ գլխին, պետք է նրան սովորեցնել ծառայել ու ապրել ընկերոջ համար»,- անդրադառնալով բանակում գրանցվող ոչ կանոնադրային հարաբեություններին ՝ասել է Արցախյան ազատամարտի մասնակից, երգիչ Դավիթ Ամալյանը:
- Ոչ մարտական պայմաններում բանակում մահացած սպա Արտակ Նազարյանի գործով դատավարության ժամանակ վկան ասել է, որ մեղադրյալները բռնություն են գործադրել սպայի նկատմամբ, իսկ թե ինչ է նշանակում բռնություն կամ ինչ տեսակի բռնություն է եղել՝ վկան չի կարողացել պատասխանել և, առաջացած խառնաշփոթի հետևանքով, դատը հետաձգվել է մեկ օրով:
- «Ադրբեջանն անընդհատ փորձում է տպավորություն ստեղծել, թե ինքն այնքան ուժեղ է, որ կարող է կամք թելադրել կամ ԼՂ հարցը լուծել ռազմական ճանապարհով, սակայն նա այդ հնարավորությունը չունի: Բաքվի քարոզչությունը լոկ հայտարարությունների վրա հիմնված քարոզչություն է, ոչ ավելին»,- ասել է ռազմական փորձագետ Գագիկ Կարապետյանը:
- «Ադրբեջանի ղեկավարությունը վստահ է, որ պատերազմով որևէ խնդիր չի կարող լուծվել, ավելին՝ այդ երկրի բանակը պատրաստ չէ պատերազմական գործողությունների»,- նշել է ռազմական փորձագետ Սամվել Պետրոսյանը:
- ԵԱՀԿ առաքելությունը ԼՂ-ի և Ադրբեջանի ԶՈՒ-ի շփման գծի պլանային դիտարկում է անցկացրել Մարտունու շրջանի Կուրապատկինո բնակավայրի մերձակայքում. խախտումներ չեն արձանագրվել:
- ՀՀ ԶՈՒ ԳՇ պետ, գեներալ-գնդապետ Յուրի Խաչատուրովի գլխավորած պատվիրակությունը հունվարի 17-19-ը մեկնել է Բրյուսել՝ մասնկացելու ՆԱՏՕ-ի ռազմական կոմիտեի և գործընկեր պետությունների Շտաբի պետերի նիստերին:
- Անդրադառնալով Ռուսաստանին պատկանող՝ Ադրբեջանում տեղակայված Գաբալայի ռադիոլոկացիոն կայանի պայմանագրի ժամկետի երկարացման խնդրին՝ «Հայացք»-ը գրում է, որ Ադրբեջանը չի կարող Վաշինգտոնի մեծագույն աջակցությոնն ակնկալելով դեմ գնալ Ռուսաստանին և Իրանին, քանի որ վերջիններս կարող են պարզապես համատեղ ձգել «պնդօղակները»:
Միջազգային լուրերը հայկական մամուլում
- «Իրանի տարածքին ռազմական հարված հասցնելն անթույլատրելի է»,- ասել է ՌԴ ԱԳ փոխնախարար Գենադի Գատիլովը: Նույն համոզմունքին է նաև ԱԳ նախարար Սերգեյ Լավրովը: «Իրանը մեր հարևանն է, եթե Իրանը ներքաշվի ռազմական գործողությունների մեջ, ապա այդ պարագայում ուղղակիորեն սպառնալիքի տակ կդրվի նաև Ռուսաստանի ազգային շահերը»,- ասել է Սերգեյ Լավրովը՝ ԱՄՆ պետքարտուղարի տեղակալ Ուլիյամ Բըրնզի հետ հանդիպման ժամանակ:
- «Տարածաշրջանի որևէ երկրում, Իսրայելից բացի, միջուկային զենք չկա։ Միջուկային զենքից տարածաշրջանը մաքրելու գաղափարը մի քանի տարի առաջ Իրանն է առաջ քաշել։ Իսրայելը չի միացել նույնիսկ Միջուկային զենքի կանխարգելման մասին համաձայնագրին։ Այդ երկիրը միջուկային մարտագլխիկներ ունի, որոնք տարածաշրջանի համար վտանգ են ներկայացնում»,- ասել է Իրանի ԱԳ նախարար Ալի Աքբար Սալեհին: Իսկ Իրանի նախագահ Մահմուդ Ահմադինեժադը հրահանգել է ուժեղացնել երկրի միջուկային ծրագրում ներառված գիտնականների անվտանգության միջոցները: Այս մասին տեղեկացրել է Իրանի գիտության, հետազոտությունների ու տեխնոլոգիաների նախարար Քյամրան Դանեշչուն՝ նշելով, որ իրանցի իրավապահները երկրում կանխել են 100 նմանատիպ ահաբեկչություն։
- Անդրադառնալով արևմուտքի կողմից Իրանի դեմ կիրառվելիք պատժամիջոցներին՝ նավթ արտահանող երկրների կազմակերպությունում (OPEC) Իրանի ներկայացուցիչ Մոհամեդ Ալի Խաթիբին հայտարարել է, որ եթե ԵՄ-ը ներկայիս ֆինանսական ճգնաժամի պայմաններում բեռնարգելք դնի իրանական նավթի ներկրման վրա, ապա դա նրա համար կլինի տնտեսական ինքնասպանություն:
- Սիրիայի ԱԳՆ-ն հայտարարությունն է տարածել, որտեղ ասվում է, որ երկիրը կտրականապես դեմ է Սիրիա արաբական երկրների զորքեր մտցնելուն. դա կհանգեցնի «իրավիճակի վատացմանը և լայն դռներ կբացի օտարերկրյա միջամտության համար»:
- Ամերիկացի՝ թոշակի անցած ադմիրալ Թիմ Քիթինգը հայտարարել է, որ Հորմուզի նեղուցում Իրանի դեմ ձեռնարկվելիք կանխարգելիչ միջոցառումների նպատակով ամերիկացի զինծառայողներին կարող է օգնել դելֆինների հատուկ նշանակության ջոկատը, իսկ թե ինչպես՝ չի մանրամասնել:
- ԱՄՆ առաջիկա նախագահական ընտրություններում հանրապետական թեկնածու Ռիկ Փերին հայտարարել է, որ եկել է ժամանակը՝ ՆԱՏՕ-ին Թուրքիայի անդամակցությունը կասկածի տակ դնելու և Անկարային ԱՄՆ-ի ցուցաբերած օգնությունը կասեցնելու համար։ Փերին դրա համար մի քանի պատճառ է նշել՝ ընդգծելով, որ Թուրքիայում իշխանությունը գտնվում է իսլամական կուսակցության ձեռքում:
- Մեծ Բրիտանիայի ՊՆ-ն բանակում կրճատումներ կիրականացնի: Սպասվում է, որ մոտակա ժամանակները ցամաքային ուժերից հեռացվելու են 2900, Ռազմաօդային ուժերից՝ մոտ 1000, իսկ նավատորմից` 300 զինծառայող: Մինչև 2015թ-ը ՄԲ-ի ՌԾՈՒ-ն և ՌՕՈՒ-ն յուրաքանչյուրը պետք է կրճատի 5000-ական զինծառայող: