Թուրքիայի Անկարա նահանգում տեղակայված զորամասերից մեկում երկու ժամկետային զինծառայողների միջև վիճաբանությունը մահվան ելքով է ավարտվել։
Թուրքական «Ասքերհաբեր» լրատվամիջոցի փոխանցմամբ՝ Ահիբոզի ժանդարմերիայի հենակետում օգոստոսի 27-ի երեկոյան ի հայտ եկած միջադեպի հետևանքով 2 զինծառայող է մահացել։
Պահակային ծառայություն կրելիս 20-ամյա շարքային Ուղուր Օզդելը վիճել է ծառայակից, 20-ամյա շարքային Օսման Դենքթաշի հետ։ Վիճաբանության ժամանակ Օզդելն իրենց ամրակցված զենքով կրակ է բացել Դենքթաշի վրա։ Վերջինս երեք հրազենային վիրավորում է ստացել, ինչի հետևանքով ավելի ուշ հիվանդանոցում մահացել է։
Ծառայակցի վրա կրակ բացելուց հետո Օզդելը կրակել է նաև ինքն իրեն՝ մահացու վիրավորում հասցնելով։
Աղբյուրը նշում է, թե ծառայակիցների հավաստմամբ՝ Օզդելը որոշակի հոգեկան խնդիրներ է ունեցել։
Դեպքի առնչությամբ հետաքննություն է ընթանում։
Նշենք, որ Թուրքիայում վերջին 1,5 տարում, ըստ պաշտոնական տվյալների, շուրջ 110 զինծառայող է ինքնասպան եղել։