Թուրքիայում զինծառայողներ զանգվածային թունավորման դեպք է արձանագրվել։ Դեպքն արձանագրված է Մանիսա նահանգի Քըրքաղաչ շրջանում տեղակայված ժանդարմերիայի ուսումնական զորամասերից մեկում օգոստոսի 24-ին։
300-ից ավել շարքային զինծառայող բարձր ջերմությամբ և ստամոքսային խանգարման ախտանիշներով տեղափոխվել են մոտակա հիվանդանոցներ։ Բժիշկները զինծառայողների մոտ սննդային թունավորում են հայտնաբերել։
Մահացության դեպքերի վերաբերյալ տեղեկություններ չեն հաղորդվում։ Ներկայում զինծառայողների մի մասը շարունակում է մնալ հիվանդանոցներում։
Պարզվել է, որ զանգվածային թունավորման պատճառն ընթրիքն է եղել։ Դեպքի առնչությամբ արդեն հետաքննություն է սկսվել։ Զորամասի ճաշարանում լուրջ ստուգումներ են անցկացվում։
Զորամասում, որտեղ էլ գրանցվել է դեպքը, ծառայություն է անցնում շուրջ 5000 զինծառայող։