Հոկտեմբերի 16-ին և 17-ին Իրաքի հյուսիսային Զափ շրջանում «Քրդստանի աշխատավորական կուսակցության» (PKK) զինյալների և Թուրքիայի ուժայինների միջև բախումներում սպանվել է 4 թուրք զինծառայող, ևս 6-ը վիրավորվել է: Այս մասին հայտնում է թուրքական պետական «Անադոլու» գործակալությունը (1, 2):
Թուրքական կողմի պնդմամբ՝ Թուրքիայի օդուժը մի քանի անգամ հարվածել է Զափ շրջանում PKK-ի դիրքերին՝ «շարքից հանելով» 16 զինյալի: Օդային հարվածներից կործանիչներից բացի, ներգրավվել են նաև հարվածային անօդաչու թռչող սարքեր:
Թուրքիայի ԶՈւ ԳՇ տվյալներով՝ 2017-ի սկիզբից մինչև այժմ թուրքական կողմը տվել է մոտ 150 զինծառայողի կորուստ, քիչ չեն նաև քրդական կողմի կորուստները:
Թուրքական օդուժը հաճախ է հարվածում PKK-ի դիրքերին Իրաքի հյուսիսում, որտեղ տեղակայված են զինյալների հիմնական բազաները և ճամբարները: