Բելառուս այցի շրջանակներում հոկտեմբերի 10-ին Ադրբեջանի պաշտպանության նախարար Զաքիր Հասանովը հանդիպել է Բելառուսի Ազգային անվտանգության խորհրդի գլխավոր քարտուղար Ստանիսլավ Զասեմին:Այս մասին հայտնում է Ադրբեջանի ՊՆ կայքը:
Ըստ հաղորդագրության՝ կողմերը քննարկել են, մասնավորապես, ռազմական, ռազմատեխնիկական ոլորտներում համագործակցության և հարաբերությունների հետագա զարգացման հարցեր:
Զաքիր Հասանովի այցը Բելառուս մեկնարկել էր հոկտեմբերի 8-ին: Նույն օրը նա ծանոթացել է Բելառուսում արտադրվող 300 մմ տրամաչափի «Պոլոնեզ» համազարկային կրակի ռեակտիվ համակարգին։
Դրանից հետո՝ հոկտեմբերի 9-ին երկու երկրների ռազմատեխնիկական ոլորտում համագործակցության հեռանկարները Հասանովը քննարկել է Բելառուսի նախագահ Ալեքսանդր Լուկաշենկոյի հետ և Բելառուսի պաշտպանության նախարարի հետ ստորագրել 2018 թ. համագործակցության ծրագիրը:
Հոկտեմբերի 10-ին Հասանովն այցելել է Բելառուսի ռազմական ակադեմիա, հանդիպում անցկացրել ակադեմիայի ղեկավարի հետ, ծանոթացել Բելառուսի ռազմաուսումնական հաստատության գործունեությանը, կառուցվածքին: