ՀԱՊԿ «Փոխգործակցություն – 2017» պլանային զորավարժության շրջանակներում անցկացվել են նաև Էրեբունի ավիաբազայում տեղակայված ՌԴ ՌՕՈւ և Հայաստանի օդուժի համատեղ վարժանքներ. Ներգրավվել են կործանիչներ, ռմբակոծիչներ, ուղղաթիռներ: Այս մասին հայտնում է ՌԴ ՊՆ կայքը:
Վարժանքներին ընդհանուր առմամբ ներգրավվել է 25 միավոր ինքնաթիռ և ուղղաթիռ: Հայկական կողմից մասնակցել են Սու-25 գրոհիչներ, իսկ ռուսաստանյան կողմից՝ ՄիԳ-29 կործանիչներ: Վարժանքներին ներգրավվել են նաև Մի-24Պ հարվածային ուղղաթիռներ:
Հայաստանի և ՌԴ օդուժը «Բաղրամյան» և «Ալագյազ» զորավարժարաններում հարվածներ է հասցրել ցամաքային թիրախներին և կրակային աջակցություն ցուցաբերել զորավարժությանը մասնակցող ՀԱՊԿ անդամ երկրների ուժերին:
Հիշեցնենք, որ «Փոխգործակցություն – 2017» զորավարժությունը մեկնարկել է հոկտեմբերի 9-ին, և շարունակվելու է մինչև հոկտեմբերի 13-ը: Զորավարժությանը ՀԱՊԿ անդամ երկրների զինված ուժերի տարբեր ստորաբաժանումներից ներգրավվել են ավելի քան 2500 զինծառայող և շուրջ 500 միավոր զինտեխնիկա, այդ թվում` 25 ավիացիոն միջոցներ և թռչող սարքեր: