Հոկտեմբերի 9-ին Բաբ էլ Մանդեբի նեղուցում ծովահենների 7 նավ հարձակվել են իրանական առևտրային նավի վրա, սակայն այդ շրջաններում հերթապահություն իրականացնող իրանական 48-րդ նավախմբի «Ալվանդ» ռազմանավը փախուստի է մատնել ծովահեններին։ Այս մասին տեղեկացնում է իրանական «Թասնիմ» լրատվական գործակալությունը։
Իրանական «Ալվանդ» ռազմանավը
Ծովահենները փորձել են առևանգել իրանական առևտրային նավը, սակայն 48-րդ նավախմբի կազմում գտնվող «Ալվանդ» ռազմանավը արձագանքել է առևտրային նավի օգնության կանչին և հակահարված է տվել ծովահեններին։
Հիշեցնենք, որ Իրանի բանակի ռազմածովային ուժերի 48-րդ նավախումբը միջազգային ջրերում հերթապահության է ուղարկվել սեպտեմբերի 2-ից։ Նավախումբը կազմված է «Ալվանդ» ականակիր նավից և «Լավան» թիկունքային ապահովման նավից։
Ավելի վաղ միջազգային ջրերում իրանական նավերի վրա ծովահենների հարձակում էր կանխել Իրանի ՌԾՈւ 44-րդ նավախումբը։
2016-ի հոկտեմբերին 44-րդ նավախմբին հաջողվել էր Ադենի ծովածոցում հետ մղել իրանական 2 առևտրային նավերի վրա ծովահենների հարձակումները: Ծովահենների մեկ այլ հարձակում նավախումբը կանխել է 2017-ի փետրվարին, Բաբ էլ Մանդեբի նեղուցում։
Իրանի ՌԾՈւ 44-րդ նավախմբի կազմում էին «Ալվանդ» ռազմանավը և «Բուշեհր» թիկունքային ապահովման նավը։
Հավելենք, որ 2008 թվականից ի վեր միջազգային ջրերում հերթապահություն իրականացնելիս Իրանի նավախմբերը 250-ից ավելի բախում են ունեցել ծովահենների հետ։