Թուրքիայի ԶՈւ ռազմաօդային ուժերը հարվածել են Իրաքի հյուսիսում, ինչպես նաև Թուրքիայի Հաքքարի նահանգում «Քրդստանի աշխատավորական կուսակցության» (PKK) դիրքերին․ նշվում է թուրքական կողմի պաշտոնական տեղեկատվությունում։ Այս մասին հայտնում է թուրքական պետական «Անադոլու» լրատվական գործակալությունը (1, 2)։
Նշվում է, որ Հաքքարիում PKK-ի անդամների տեղը հստակեցրել են անօդաչու թռչող սարքերի միջոցով․ հարվածի արդյունքում «չեզոքացվել է» կառույցի 5 անդամ։
Գրեթե նույնը ասվում է նաև Իրաքի հյուսիսային լեռնային շրջաններում քրդական կառույցի դիրքերին հարվածելու մասին հաղորդագրությունում։ Թուրքական կողմը նաև հայտում է, թե PKK-ի անդամները նախապատրաստվում էին հարձակվել իրենց դիրքերին։
Մասնավորապես Իրաքի հյուսիսում ավիահարվածները պլանային բնույթ են կրում, սակայն հաճախակիացել են վերջին մեկ ամսում։