Թուրքիայի նախագահի խոսնակ Իբրահիմ Քալընը հայտարարել է, որ անհրաժեշտության դեպքում Թուրքիայի զինուժը գործողություններ կսկսի Սիրիայի հյուսիսում՝ քրդերի վերահսկողության ներքո գտնվող Աֆրին շրջանում:Փոխանցում է թուրքական CNN Turk հեռուստաընկերության կայքը:
Թուրքիայի զինուժը թրթուրավոր զրահամեքենաներ է ուղարկել Սիրիայի հետ սահման
«Անհրաժեշտություն լինի՝ կմտնենք, գործողության համար բոլոր պատրաստությունները արված են: Թուրքիան իր անվտանգության համար կմիջամտի ցանկացած վայրում և ցանկացած ժամանակ, երբ անհրաժեշտ կգտնի», — ասել է Քալընը:
Նշենք, որ վերջին շրջանում Թուրքիան մեծ թվով զինտեխնիկա է կուտակել անմիջապես Աֆրին շրջանին սահմանակից նահանգներում: Նոր զինտեխնիկայով և զինծառայողներով են համալրվել Աֆրինի անմիջապես հանդիպակաց նահագներում տեղակայված ստորաբաժանումները:
Սիրիայի հյուսիսում գործում է 2 փաստացի ինքնավար քրդական շրջան (կանտոն), որոնք վերահսկում են քրդական «Ժողովրդավարական միություն կուսակցությունը» (PYD) և դրա ռազմական թև «Ժողովրդական ինքնապաշտպանության ջոկատները» (YPG): Այդ երկու ինքնավար շրջանների միջև ընկած տարածքը ներկայում վերահսկում են Թուրքիայի զինուժը և նրանց աջակցող զինված խմբավորումները:
Թուրքական կողմը քրդական այս խմբավորումը համարում է «Քրդստանի աշխատավորական կուսակցության» (PKK) «սիրիական ճյուղավորում և ահաբեկչական կառույց»:
Միևնույն ժամանակ, Սիրիայի քրդական ուժերին ԱՄՆ-ի կողմից աջակցությունը լարվածություն է առաջացրել նաև թուրք-ամերիկյան հարաբերություններում: Թուրքական կողմը բազմիցս կոչ է արել ԱՄՆ-ին դադարեցնել ռազմական աջակցությունը Սիրիայի քրդերին:
Թուրքիայի պաշտպանության նախարարը հայտարարել է, որ քրդերին Միացյալ Նահանգների կողմից զենք մատակարարումների շարունակության դեպքում, Թուրքիան չի սահմանափակվի միայն զգուշացումներով: Թուրք նախարարը սրանով սպառնացել է ռազմական գործողություններ իրականացնել քրդերի դեմ Սիրիայում: