Սիրիայի Իդլիբ նահանգում ձևավորված «ոչ բախումային կամ ապաէսկալացման գոտու» ներսում ծառայություն են իրականացնելու Թուրքիայի զինված ուժերը, իսկ դրա սահմաններից դուրս՝ Ռուսաստանի ԶՈւ ստորաբաժանումները: Այս մասին հոկտեմբերի 5-ին հայտարարել է Թուրքիայի նախագահ Ռեջեփ Թայիփ Էրդողանը, փոխանցում է Habertürk հեռուստաընկերության կայքը:
Իրադրությունը Սիրիայում 2017-ի սեպտեմբերի 30-ի դրությամբ
«ՌԴ նախագահ Պուտինը Թուրքիայում էր: Քննարկել ենք, թե ինչպես կարող ենք գործարկել եռաչափ մեխանիզմները: Առաջիկա օրերում կտեսնենք, թե մեր համապատասխան ստորաբաժանումները ինչ քայլեր կկատարեն: «Ոչ բախումային գոտու սահմանների հարցում, դրա ներսում և դրսում ծառայության բաժանումն արվել է…: Թուրքիայի զինված ուժերը Իդլիբի ներսում ծառայություն կիրականացնի, իսկ Ռուսաստանի ԶՈւ-ն՝ սահմաններից դուրս», — հայտարարել է Էրդողանը:
Նշենք, որ Իդլիբ նահանգում ներկայում գործում են տարբեր զինյալ և ահաբեկչական խմբավորումներ: Իդլիբ նահանգում հատկապես ակտիվ է«Ան-Նուսրայի ճակատ» (ներկայում՝ «Թահրիր աշ-Շամ») ահաբեկչական խմբավորումը:
Սեպտեմբերի 13-15-ին Ղազախստանի մայրաքաղաք Աստանայում անցկացվել է Սիրիայի հարցով բանակցությունների 6-րդ փուլը: Դրանց ընթացքում կողմերը համաձայնության են եկել Իդլիբ նահանգում ևս «ապաէսկալացման գոտի» ստեղծելու վերաբերյալ:
Սիրիայում «ապաէսկալացման գոտիների» ստեղծման և հրադադարի պահպանման երաշխավորներ են Թուրքիան, Ռուսաստանը և Իրանը:
Նշենք, որ ներկայում Թուրքիայի զինուժը և նրանց աջակցող խմբերը նաև վերահսկում են Սիրիայի հյուսիսում մոտ 2000 քառ. կմ տարածք՝ Ջերաբլուսից մինչև Ազեզ ընկած տարածքները: Այդ տարածքները Թուրքիայի զինուժը գրավել է 2016-ի օգոստոսից 2017-ի մարտ ամիսներին իրականացված «Եփրատի վահան» գործողության ընթացքում: