Սեպտեմբերի 18-21-ը Մոլդովայում անցկացվելու է MOLDEX-2017 փրկարարների լայնամասշտաբ դաշտային վարժանք, որին մասնակցում է 9 երկիր, այդ թվում նաև Հայաստանը, Ադրբեջանը և Վրաստանը: Այս մասին հայտնում է ՀՀ ԱԻՆ կայքը:
ՀՀ ԱԻՆ 26 հոգանոց պատվիրակության կազմում են ինչպես քաղաքային որոնողափրկարարական, այնպես էլ՝ քիմիական, կենսաբանական, ճառագայթային և միջուկային (CBRN) պատահարներին արձագանքող թիմի փրկարարներ:
Սցենարի համաձայն՝ մասնակից թիմերի հիմնական խնդիրը լինելու է 3 տեսակի աղետներին արձագանքումը (երկրաշարժ, ջրհեղեղ և քիմիական վթար):
Հայաստանցի փրկարարները իրականացնելու են որոնողական աշխատանքներ՝ հատուկ որոնման սարքերով, փլատակների քանդում-կտրում, պարանային աշխատանքներ, տուժածների որոնում և դուրսբերում, ինչպես նաև՝ կիրառելու են քիմիական վթարի արձագանքման միջոցներ: Նրանք Մոլդովա են մեկնում տեխնիկական հագեցվածությամբ:
Բացի վերը նշված երկրներից, վարժանքին նաև մասնակցում են Բելառուսը, Մոլդովան, Ուկրաինան, Չեխիան, Դանիան, Ռումինիան:
ՀՀ ԱԻՆ փրկարարները Մոլդոցվա մեկնելուց առաջ ստուգատես են անցնում
Վարժանքն անցկացվում է Եվրամիություն «Տարերային և տեխնածին աղետների կանխարգելում, պատրաստվածություն և արձագանքում արևելյան տարածքում» (PPRD East 2) ծրագրի շրջանակում:
Սեպտեմբերի 14-ին ՀՀ ԱԻՆ ՓԾ հատուկ նշանակության փրկարարական աշխատանքների իրականացման կենտրոնում անցկացվել է MOLDEX-2017 միջազգային վարժանքի մասնակից անձնակազմի ստուգատեսը:
Հիմնական նպատակն է ամփոփել PPRD East 2 ծրագրի շրջանակներում կատարած աշխատանքը, ինչպես նաև՝ բարելավել տարբեր երկրների թիմերի միջև համագործակցության արդյունավետությունը: