Սիրիայի Հալեպ քաղաքից հյուսիս՝ Թել-Ռիֆաթի շրջանում, Սիրիայի քրդական ուժերի և Թուրքիայի հովանավորությամբ կռվող զինյալ խմբավորումների միջև «ոչ բախումային գոտի» է սահմանվել: Այդ ատարածքում քրդական ուժերին փոխարինել են ՌԴ ՊՆ ռազմական ոստիկանության ուժերը: Այս մասին սեպտեմբերի 6-ին հայտարարել է ՌԴ ԶՈւ ԳՇ օպերատիվ վարչության պետ, գեներալ-գնդապետ Սերգեյ Ռուդսկոյը:
«Ոչ բախումային գոտին» ստեղծվել է Սիրիայի քրդական զինուժի՝ «Ժողովրդական ինքնապաշտպանության ուժերի» (YPG) և «Սիրիայի ազատ բանակի միջև» բախումներից խուսափելու համար. նշել է Ռուդսկոյը:
«Սիրիայի ազատ բանակ» խմբավորումն իրականում որպես այդպիսին վաղուց դադարեցրել է իր գործունեությունը: Ներկայում կան առանձին խմբավորումներ, որոնք ներկայանում են նաև այդ անվան տակ: Նշված տարածքում՝ Հալեպից հյուսիս, Թուրքիայի զինված ուժերի ստորաբաժանումներն են, և Թուրքիայի հովանավորությամբ գործող որոշ զինված խմբավորումներ:
Այդտեղ հիմնականում տեղակայվել են Սիրիայի «թուրքմեններից»՝ տեղի թյուրքական ժողովուրդներից կազմված ստորաբաժանումներ, որոնք սպառազինվում են Թուրքիայի կողմից:
ՌԴ ԶՈւ գեներալը նշել է, որ կողմերի միջև բախումներից խուսափելու համար քրդական ուժերը հետ են քաշվել Թել-Ռիֆաթի շրջանից. նրանց փոխարինել են ՌԴ ՊՆ ռազմական ոստիկանության և Սիրիայի բանակի ստորաբաժանումները:
Եթե նշված համաձայնությունը ուժի մեջ է մտել, ապա սա կարող է նշանակել, որ թուրքական կողմը քրդերի հարցում որոշակի զիջման է գնացել՝ հրաժարվելով առնվազն այդ հատվածում քրդական ուժերի դեմ գործողություններից: Սակայն առայժմ պարզ չէ, թե արդյո՞ք սա միայն տեղի զինյալ խմբավորումներին է վերաբերում, թե նաև Թուրքիայի զինուժին:
Թուրքական կողմն առայժմ չի մեկնաբանել այս հայտարարությունը: