Օգոստոսի 31-ին՝ Արցախի 26-րդ տարեդարձի կապակցությամբ պարգևատրման հանդիսավոր արարողության ժամանակ, Արթուր Աղաբեկյանին շնորհվել է «Արցախի հերոս» կոչում և «Ոսկե Արծիվ» շքանշան։ Այս մասին հայտնում է Արցախի նախագահի կայքը։
Պետական բարձր պարգևներով պարգևատրվել են Պաշտպանության բանակի զինծառայողներ, ազատամարտիկներ, մի խումբ պետական և հասարակական գործիչներ, դիվանագետներ, բարերարներ, տնտեսության, կրթության և մշակույթի ոլորտների ներկայացուցիչներ: Բացի այդ, արվեստի և լրագրության զարգացման գործում ունեցած նշանակալի ավանդի համար մի խումբ անձանց շնորհվել են պատվավոր կոչումներ:
Միջոցառմանը ներկա էին Հայ Առաքելական Եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, Արցախ ԱԺ նախագահ Աշոտ Ղուլյանը, վարչապետ Արայիկ Հարությունյանը, պաշտոնատար այլ անձինք։
Արթուր Աղաբեկյանի կենսագրությունը՝ ՀՀ ԱԺ կայքից․
Ծնվել է 1963թ. նոյեմբերի 24-ին ԼՂ Հադրութի շրջանի Մեծ Թաղլար գյուղում:
1986թ. ավարտել է Երևանի պոլիտեխնիկական ինստիտուտը` ինժեներ-էլեկտրատեխնիկի մասնագիտությամբ:
1986-1988թթ. աշխատել է «Հայգյուղ-մեքենայացում» ԳԱԱ-ում` որպես գիտական աշխատող:
1988-1994թթ. մասնակցել է Արցախի ազատագրական պայքարին, եղել է ԼՂ Հադրութի պաշտպանական շրջանի առաջին հրամանատարը, ապա` ԼՂ պաշտպանության բանակի շտաբի 4-րդ բաժնի պետը:
1992թ. եղել է ԼՂ ԳԽ առաջին նախագահի խորհրդական:
1992-1996թթ. եղել է ԼՂ պաշտպանության բանակի առաջին ՊՇ հրամանատար:
1997-1999թթ. եղել է 1-ին ԲՇ հարավ-արևելյան բրիգադի հրամանատարը:
1999թ. ԼՂ նախագահի հրամանագրով նշանակվել է ԼՂ ներքին գործերի նախարար:
1999թ. ՀՀ վարչապետի որոշմամբ նշանակվել է ՀՀ կառավարության տարածաշրջանային ինտեգրման վարչության պետ:
2000թ. նշանակվել է ՀՀ պաշտպանության փոխնախարար:
2000թ. ՀՀ նախագահի հրամանագրով նրան շնորհվել է գեներալ-մայորի զինվորական կոչում:
2003թ. ՀՀ նախագահի հրամանագրով նրան շնորհվել է գեներալ-լեյտենանտի զինվորական կոչում:
2007թ. մայիսի 12-ին Ազգային ժողովի պատգամավոր է ընտրվել համամասնական ընտրակարգով ՀՅԴ կուսակցությունից:
2007թ. հունիսի 7-ին ընտրվել է Ազգային ժողովի պաշտպանության, ազգային անվտանգության և ներքին գործերի մշտական հանձնաժողովի նախագահ, իսկ 2009 թվականի մայիսի 21-ին տվել է հրաժարական:
[2012 թ. սեպտեմբերի 22-ին Արցախի ղեկավարի հրամանագրով նշանակվել է Արցախի փոխվարչապետ։
2017-ի մայիսի 20-ին Արցախի ղեկավարի հրամանագրով, իր դիմումի համաձայն՝ ազատվել է Արցախի փոխվարչապետի պաշտոնից]։
Պարգևատրվել է ՀՀ երկրորդ աստիճանի «Մարտական խաչ», ԼՂՀ առաջին աստիճանի «Մարտական խաչ» շքանշաններով, «Խիզախության համար», «Դրաստամատ Կանայան» մեդալներով, «Մարշալ Բաղրամյան-100» հուշամեդալով:
Ամուսնացած է, ունի երեք երեխա։