[Թարմացված]․ Օգոստոսի 4-ին Ադրբեջանը Տավուշի դիմաց «կորցրել է» երկու զինծառայող

Ադրբեջանական բաց աղբյուրների մշտադիտարկման արդյունքում պարզվել է, որ, ամենայն հավանականությամբ օգոստոսի 4-ին, Ադրբեջանի Թովուզի շրջանի Ալիբեյլի գյուղի դիրքերում (ՀՀ Տավուշի մարզի Ներքին Կարմիրաղբյուր գյուղի դիմաց) սպանվել է Ադրբեջանի ԶՈւ պայմանագրային զինծառայող։

Ադրբեջանի բանակի պայմանագրային զինծառայող, 1986 թ․ ծնված Ահմադով Շահին Շամիստան օղլուի (Əhmədov Şahin Şəmistan oğlu) մահվան մասին հայտնել են նրա համագյուղացիները, հարազատները՝ Աղստաֆայի շրջանի Սադըխլը գյուղից։

Թարմացում․ Ադրբեջանական ընդդիմադիր MeydanTV լրատվակայքը փոխանցում է Թովուզի շրջանի տեղական ինքնակառավարման մարմնի ներկայացուցչից ստացած տեղեկությունը, որ Ահմադով Շահինին, ինչպես նաև ժամկետային զինծառայող Մուսաև Վահիդին սպանել են համածառայակիցները։

Նշվում է, որ զինծառայողներին Ադրբեջանի ԶՈւ դիրքերից մեկի կողքով անցնելիս սպանել են համածառայակիցները, այն բանից հետո, երբ նրանք չեն կարողացել ասել «գաղտնաբառը»։

Ադրբեջանի բանակի պայմանագրային զինծառայող, Ահմադով Շահին Մուսթաֆա օղլու (Əhmədov Şahin Şəmistan oğlu)

Առայժմ մահվան ստույգ պատճառը չի նշվում, պաշտոնական որևէ տեղեկատվություն չի տարածվել։ Ըստ ադրբեջանցի օգտատերերից մեկի գրառման՝ զինծառայողը մահացել է Ալիբեյլի գյուղի դիրքերում հերթապահություն իրականացնելիս։

Տարօրինակ զուգադիպությամբ՝ օգոստոսի 4-ին բաց աղբյուրներից հայտնի էր դարձել Ալիբեյլի գյուղի դիրքերում Ադրբեջանի բանակի մեկ այլ զինծառայողի մահվան մասին։ Այդ ժամանակ նշվում էր, որ Մուսաև Վահիդ Վուգար օղլուն (Musayev Vahid Vüqar oğlu) սպանվել է «հայկական կողմի կրակոցից»։ Այս դեպքի կապակցությամբ ևս ադրբեջանական կողմը պաշտոնական տեղեկություն չի տրամադրել։

Հիշեցնենք, որ օգոստոսի 1-ին, ՀՀ Տավուշի մարզի առաջապահ դիրքերից մեկում հակառակորդի կրակոցից վիրավորվել էր պայմանագրային զինծառայող Արմեն Մեխակի Նազլուխանյանը (ծնվ. 1986 թ.):

Չի բացառվում, որ Ադրբեջանի բանակի երկու զինծառայողներն էլ սպանվել են հայկական կողմի պատասխան կրակից, բայց այս տեղեկությունն առայժմ այլ աղբյուրներով չի հաստատվել։