Հուլիսի 28-ին Թուրքիայի ԶՈւ գլխավոր շտաբի պետ, բանակի գեներալ Հուլուսի Աքարն այցելել է զինված ուժերի՝ երկրի հարավարևելյան Շրնաք նահանգում տեղակայված ստորաբաժանումներ: Այս մասին հայտնում է թուրքական պետական «Անադոլու» գործակալությունը:
Շրնաք քաղաք այցելության ընթացքում Հուլուսի Աքարը հանդիպել է Շրնաքի նահանգապետին, ժանդարմերիայի 23-րդ դիվիզիայի հրամանատարին, նահանգի անվտանգության ծառայության (ոստիկանության) պետին:
Հուլուսի Աքարին ուղեկցել են ցամաքային զորքերի հրամանատար, բանակի գեներալ Սալիհ Զեքի Չոլաքը, ցամաքային զորքերի 2-րդ բանակի հրամանատար գեներալ-գնդապետ Իսմաիլ Մեթին Թեմելը և ժանդարմերիայի զորքերի ղեկավար, գեներալ-գնդապետ Արիֆ Չեթինը:
Հուլիսի 27-ին Թուրքիայի ԶՈւ ԳՇ պետը այցելել է նաև Շանլըուրֆա և Հաթայ նահանգների ստորաբաժանումներ:
Նշենք, որ թուրք-քրդական բախումների առավել ակտիվ կենտրոններից է Շրնաք նահանգը: Բացի այդ, այս նահանգը բախումների հետևանքով ամենաշատ վնասներ կրած շրջաններից: Շրնաք քաղաքի շինությունների 70 տոկոսը ավերվել է բախումների հետևանքով: