Հուլիսի 25-27-ը Պաշտպանության բանակում անցկացվել են համաբանակային շտաբային զորավարժություններ, որոնց մասնակցել են ՊԲ վարչությունը, միավորումների, զորամասերի և գումարտակների հրամանատարական կազմը, շտաբերն ու ղեկավարման մարմինները: Այս մասին հայտնում է ՊԲ կայքը։
ՊԲ տարվա պատրաստության պլանով նախատեսված զորավարժությունների նպատակն էր կատարելագործել բանակի ղեկավարման համակարգը, հրամանատարների ու շտաբերի տեսական ու գործնական ունակությունները, նրանց պատրաստության և փոխգործակցության մակարդակը:
Զորավարժությունների ընթացքին հետևել են ՊԲ հրամանատար գեներալ-լեյտենանտ Լևոն ՄՆացականյանն ու բանակի հրամանատարի տեղակալները:
Լևոն Մնացականյանը մասնավորապես ուշադրություն է դարձրել բոլոր օղակի ղեկավար մարմինների մարտավարամասնագիտական կարողություններին, ներգրավված սպայակազմի՝ իրադրության գնահատման և որոշումներ ընդունելու ունակություններին, վարվող փաստաթղթերի ճշգրտությանը։ Թերացումների վերացման նպատակով բանակի հրամանատարը տվել է ցուցումներ ու հանձնարարականներ: