Վերջին տարիներին Իրանում 120-ից ավելի ահաբեկչական գործողություն է կանխվել, իսկ այդ գործողությունները ծրագրող անձինք կամ ձերբակալվել են, կամ սպանվել։ Այս մասին հայտարարել է Իրանի հետախուզության նախարար Մահմուդ Ալավին։ Հուլիսի 25-ին տեղեկացնում է իրանական Press TV լրատվական գործակալությունը։
Մինչ այդ Ալավին հայտարարել էր, որ միայն վերջին 2 տարվա ընթացքում Իրանում 100-ից ավելի ահաբեկչական գործողություն է կանխվել։
Ալավին հավելել է նաև, որ Թեհրանի ահաբեկչական հարձակումներին անմիջականորեն և ոչ անմիջականորեն ներգրավված բոլոր անձինք հայտնաբերվել և ձերբակալվել են։
Ավելի վաղ Ալավին հայտարարել էր, որ տարեցտարի ահաբեկչական խմբերը շատանում են Իրանում․
«Մեզ համար զարմանալի էր, որ եթե նախորդ տարիներին ամիսը 2 կամ շաբաթը 1 ահաբեկչական խումբ էինք հայտնաբերում, ապա այս տարի գրեթե ամեն օր ենք հայտնաբերում», — ասել էր Ալավին։
Հունիսի 7-ին Իրանի մայրաքաղաք Թեհրանում ահաբեկիչները հարձակվել էին խորհրդարանի շենքի և Իմամ Խոմեյնու դամբարանի վրա։ Հարձակումների հետևանքով սպանվել էր 17, վիրավորվել՝ 52 մարդ։ Ահաբեկչության պատասխանատվությունը իր վրա էր վերցրել «Իսլամական պետություն» ահաբեկչական խմբավորումը։
Ահաբեկչական հարձակումներից հետո Իրանը խստացրել է հսկողությունը և ահաբեկիչների «որս» է սկսել։ Գործի դնելով իր բոլոր ուժային կառույցները՝ Իրանը արդեն տասնյակ ահաբեկիչների է վնասազերծել։ Իսկ հունիսի 18-ին, ի պատասխան Թեհրանի ահաբեկչական հարձակումներին, Իրանը հրթիռային հարվածներ է հասցրել Սիրիայում ԻՊ դիրքերին։
Իրանը հսկողությունը խստացրել է հատկապես երկրի հյուսիս-արևմուտքում և հարավ-արևելքում, որտեղ գործում են քրդական, բելուջական ընդդիմադիր, զինյալ խմբավորումներ։ Այս շրջանակներում Իրանը նաև հարվածներ է հասցնել Իրաքի և Պակիստանի սահմանկից շրջաններին, որտեղից ներթափանցում, գործում կամ որտեղ փախնում են այդ խմբավորման անդամները։
Վերջին տարիներին Իրանում տեղի ունեցած ահաբեկչական գործողությունների ժամանակագրությանը կարող եք ծանոթանալ այստեղ։