Հուլիսի 14-ին Ստավրոպոլում ավարտվել են Ռուսաստանի օդուժի 4-րդ բանակի ավիացիայի և ԶՈւ հարավային ռազմական շրջանի ՀՕՊ ստորաբաժանումների թռիչքա-մարտավարական վարժանքները։ Այս մասին տեղեկացնում է ՌԴ ՊՆ կայքը։
Վարժանքների սցենարներից մեկով անօդաչու թռչող սարքերի միջոցով հայտնաբերվել և չկառավարվող ավիացիոն հրթիռներով ոչնչացվել է պայմանական հակառակորդի կուտակած զինտեխնիկան։
Վարժանքների ընթացքում օդաչուները իրականացրել են նաև դժվար աշխարհագրական և եղանակային պայմաններում վայրէջք կատարելու, բարձր լեռնային վայրերում դեսանտ իջեցնելու, պայմանական հակառակորդի կենդանի ուժը, ենթակառուցվածքային օբյեկտները ոչնչացնելու գործողություններ։
Վարժանքներին ներգրավվել էր շուրջ 50 օդաչու, ավելի քան 20 ուղղաթիռ՝ այդ թվում Մի-8ԱՄՏՇ «Տերմինատոր», Մի-28Ն «Գիշերային որսորդ» և Մի-35Մ ուղղաթիռներ։ Վարժանքները մեկնարկել էին հուլիսի 12-ին։
Հիշեցնենք, որ Ռուսաստանի զինված ուժերի հարավային ռազմական շրջանի մեջ մտնում են երկրի կովկասյան տարածքում, դրանից հյուսիս, Ղրիմում տեղակայված զորամասերն ու Աբխազիայում, Հարավային Օսիայում և Հայաստանում տեղակայված բազաները:
Հայաստանի հետ միացյալ ՀՕՊ համակարգի մասին համաձայնագրով՝ այս միավորման օդուժն ու ՀՕՊ ստորաբաժանումներն անհրաժեշտության դեպքում կարող են ներգրավվել Հայաստանի օդային տարածության պաշտպանությանը: