Օգոստոսի 31-ից սեպտեմբերի 14-ը Վրաստանում կանցկացվի Agile Spirit 2017 միջազգային զորավարժությունը, որին կմասնակցեն նաև ՀՀ ԶՈւ ներկայացուցիչներ: Այս մասին հայտարարվել է զորավարժության նախապատրաստական հարցերով հուլիսի 12-ին Թբիլիսիում անցկացված կոնֆերանսի ժամանակ, փոխանցում է Վրաստանի ՊՆ մամուլի ծառայությունը:
ԱՄՆ զինուժի LAV-25 զրահափոխադրիչը Վրաստանում անցկացվող զորավարժության ժամանակ (արխիվ)
Զորավարժությանը կմասնակցեն նաև Ուկրաինան, Ռումինիան, Լատվիան, Բուլղարիան և ԱՄՆ-ն: Վարժանքները կանցկացվեն երկու փուլով՝ շտաբային և դաշտային: Դաշտային փուլը կանցկացվի «Օրփոլո» զորավարժարանում:
Agile Spirit զորավարժությունն անցկացվել է նաև 2016-ին: Դրան Վրաստանի զինծառայողների հետ մասնակցում էին նաև Բուլղարիայի, Ռումինիայի, Ուկրաինայի, Լատվիայի զինված ուժերի և ԱՄՆ ծովային հետևակի զինծառայողներ:
Նշենք, որ Հայաստանն այս տարի մասնակցելու է Վրաստանում անցկացվելիք ևս մեկ զորավարժության: Noble Partner-2017 զորավարժությանը Հայաստանը կներկայանա ՀՀ ԶՈւ զինհոսպիտալի անձնակազմով: Այդ զորավարժությանը ներգրավված են նաև ԱՄՆ-ն, Մեծ Բրիտանիան, Գերմանիան, Թուրքիան, Իսպանիան, Ռումինիան, Սլովենիան, Ուկրաինան, Ադրբեջանը:
Թեմայի մանրամասները՝ Ռազմինֆոյի և Հանրային ռադիոյի համատեղ հաղորդման մեջ.