2016 թվականին պաշտպանության բնագավառում ՀՀ պետական բյուջեից կատարվել են 225,9 մլրդ դրամ ծախսեր` կազմելով ծրագրի 103,9%-ը: Այս մասին նշվում է ՀՀ 2016թ. բյուջեի կատարման վերաբերյալ ՀՀ կառավարության հաշվետվության մեջ, որն արդեն հաստատվել է Ազգային ժողովում:
ԱԿՄ ավտոմատներ
2016 թվականի բյուջեով նախատեսված ծախսերը պիտի լինեին 207,3 մլրդ դրամ, իսկ տարվա ընթացքում օրենքի փոփոխություններով հաստատված ծախսերը՝ 217,4 մլրդ դրամ:
Հաշվետվության մեջ նշվում է, որ շեղումը (գերակատարումը) պայմանավորված է Ռուսաստանի տրամադրած պետական արտահանման վարկի հաշվին ռուսական արտադրության ռազմական նշանակության արտադրանքի մատակարարումների ծրագրի շրջանակներում կատարված ծախսերի գերազանցմամբ:
Նախորդ տարի այս ոլորտի ծախսերը չէին կատարվել և դրանք փոխանցվել են այս տարի՝ ընդհանուր առմամբ ավելացնելով այս տարի ծրագրի ֆինանսավորմանն ուղղված միջոցները:
«Ռուսաստանի Դաշնության կողմից տրամադրված պետական արտահանման վարկի հաշվին ռուսական արտադրության ռազմական նշանակության արտադրանքի մատակարարումների ֆինանսավորումը կազմել է 24,5 մլրդ դրամ կամ ծրագրի 183,9%-ը: Հիմնականում նշված հանգամանքով պայմանավորված՝ 2015 թվականի համեմատ ռազմական պաշտպանության ծախսերն ավելացել են 14,1%-ով», — նշված է հաշվետվության մեջ:
Հայաստանի 2016թ. պաշտպանական բյուջեի մյուս առանձին կետերի մասով փոփոխություններն աղյուսակով ներկայացված են ստորև (թվերը՝ հազար դրամներով).
| Ոլորտ | Պլան | Ճշտված | Կատարված | Տարբերություն |
| Պաշտպանության (ընդհանուր) | 207 270 834,1 | 217 370 619,5 | 225 877 188,0 | 103,9% |
| Ռազմական պաշտպանություն | 199 615 244,9 | 209 161 147,5 | 218 060 204,8 | 104,3% |
| Արտաքին ռազմական օգնություն | 162 282,1 | 162 282,1 | 162 281,5 | 100,0% |
| Հետազոտական և նախագծային աշխատանքներ պաշտպանության ոլորտում | 1 641 470,1 | 1 641 470,1 | 1 623 449,0 | 98,9% |
| Պաշտպանություն (այլ դասերին չպատկանող) | 5 851 837,0 | 6 405 719,8 | 6 031 252,7 | 94,2% |
Հիշեցնենք, որ արդեն Հայաստանի 2017 թվականի ռազմական բյուջեն նախորդ տարվա ռազմական բյուջեին գերազանցում է 2 մլրդ դրամով:
2016թ. դեկտեմբերի 20-ին ՀՀ նախագահ Սերժ Սարգսյանը ստորագրել է «Հայաստանի Հանրապետության 2017 թվականի պետական բյուջեի մասին» ՀՀ օրենքը, որն ավելի վաղ ընդունվել էր ՀՀ Ազգային ժողովում:
| Ոլորտը | 2016 (պլան) | 2017 (պլան) |
| Պաշտպանություն (ընդհանուր) | 207 269 656,1 | 209 813 481,1 |
| Ռազմական պաշտպանություն | 199 615 244,9 | 202 106 217,2 |
| Արտաքին ռազմական օգնություն | 162 282,1 | 162 818,4 |
| Հետազոտական և նախագծային աշխատանքներ | 1 641 470,1 | 1 641 470,1 |
| Պաշտպանություն (այլ դասերին չպատկանող) | 5 850 659,0 | 5 902 975,4 |