2016-ին Հայաստանում միջոցառումներ են իրականացվել ռազմական կրթության գրավչության բարձրացման ուղղությամբ: Այս ոլորտում բազում խնդիրներ կան, այդ թվում առկա է նաև ռազմական ուսումնական հաստատություններում պակաս համալրվածություն:
Այս մասին հուլիսի 6-ին՝ ՀՀ ԱԺ նիստի ժամանակ, հայտնել է ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Կորյուն Նահապետյանը:
«Այստեղ մենք պետք է իրականացնենք համակարգային բարեփոխումներ ռազմական կրթական համակարգը ժամանակակից պահանջներին համապատասխանեցնելու ուղղությամբ»:
Մինչ այդ՝ հունիսի 28-ի ասուլիսի ժամանակ, խոսելով ռազմական ուսումնական հաստատությունների մասին, Վիգեն Սարգսյանը հայտնել էր, որ մրցութային են Մոնթե Մելքոնյանի անվան ռազմական վարժարան և ՀՀ ՊՆ մարշալ Ա. Խանփերյանցի անվան ռազմական համալսարան ընդունելությունը, իսկ Վազգեն Սարգսյանի անվան համալսարան անցած տարվա ընդունվածների չափ դիմում կա:
Ըստ ԱԺ հանձնաժողովի նախագահի՝ 2016-ին ձեռքբերումներ են ունեցել նաև ռազմաբժշկական ոլորտում, ռազմաբժշկական հաստատությունները համալրվել են նոր սարքավորումներով, զինծառայողները ստացել են վերականգնողական մասնագիտացված բուժօգնություն, զինծառայողների և նրանց ընտանիքների անդամների համար կատարվել են կանխարգելիչ հետազոտություններ:
«Միևնույն ժամանակ ռազմաբժշկական հաստատությունները ձեռք են բերել նախատեսված քանակից պակաս սարքավորումներ, ոչ ամբողջությամբ են իրականացրել նաև զինծառայողների և նրանց ընտանիքների անդամների համար կանխարգելիչ հետազոտությունները», — նշել է Կորյուն Նահապետյանը: