Հունիսի 26-ին Իրանի հյուսիսարևմտյան Արևմտյան Ադրբեջան նահանգի Մակուի շրջանի Զաքերլու գյուղում քրդական «Փեժակ» խմբավորման 8 զինյալ հարձակվել են Իրանի իսլամական հեղափոխության պահապանների կորպուսի (ԻՀՊԿ) բասիջ ստորաբաժանման զինծառայող Մոսթաֆա Ֆիրդուսիի տան վրա և սպանել զինծառայողին։ Այս մասին հունիսի 28-ին տեղեկացնում է իրանական «Մեհր» լրատվական գործակալությունը։
Սպանությունից հետո զինյալները դիմել են փախուստի։ Դեպքի վայրից հայտնաբերվել են Կալաշնիկովի և HK G-3 ավտոմատների փամփուշտներ։
Ավելի վաղ Արևմտյան Ազարբայջան (Ատրպատական) նահանգում զինյալների հետ բախումների հետևանքով սպանվել էր Իրանի սահմանապահ ծառայության 2 զինծառայող, ևս 5-ը վիրավորվել էին։
«Փեժակը» (քրդ. Partiya Jiyana Azad a Kurdistanê, PJAK , «Քուրդիստանի ազատ կյանքի կուսակցություն») Իրանում ստեղծված (2003թ) քրդական կազմակերպություն է: Ղեկավարվում է PKK-ի կողմից: Գործում է հիմնականում Իրանի Քուրդիստան, Արևմտյան Ազարբայջան և Քերմանշահ նահանգներում:
Կառույցի ռազմական թևը կոչվում է HRK (քրդ. Hêzên Rojhilata Kurdistan, «Արևելյան Քուրդիստանի ինքնապաշտպանություն»): Վերջինս 2004 թվականից Իրանում քրդական ազգային ինքնավարություն ստեղծելու համար բախումների մեջ է իրանական իշխանությունների հետ: