Իրանի իսլամական հեղափոխության պահապանների կորպուսը (ԻՀՊԿ) նոր մանրամասներ է ներկայացրել հունիսի 18-ին Դեր Զորում «Իսլամական պետություն» ահաբեկչական խմբավորման դիրքերի հրթիռակոծումից։ ԻՀՊԿ հաղորդած տվյալների համաձայն՝ հրթիռակոծումից սպանվել են ավելի քան 170 ԻՊ զինյալ՝ ներառյալ խմբավորման հրամանատարներ։Այս մասին հունիսի 21-ին փոխանցում է իրանական «Թասնիմ» լրատվական գործակալությունը։
Ըստ ԻՀՊԿ-ի՝ գործողությունը նաև նախօրոք համակարգվել է Իրանի զինված ուժերի գերագույն գլխավոր հրամանատարի՝ Ալի Խամենեիի և զինված ուժերի գլխավոր շտաբի պետի՝ Մոհամմադ Հոսեյն Բաղերիի հետ։
Իրանը «Զոլֆաղար» հրթիռ է արձակում ԻՊ դիրքերի ուղղությամբ
Հունիսի 18-ին Իրանը երկրի Քերմանշահ և Քուրդիստան նահանգներից 6 միավոր մակերևույթ-մակերևույթ դասի, միջին հեռահարության «Զոլֆաղար» հրթիռ էր արձակել Դեր Զորում «Իսլամական պետություն» ահաբեկչական խմբավորման դիրքերի ուղղությամբ։ Հրթիռներն անցել են Իրաքի տարածքով և խոցել ԻՊ հրամանատարական կետը և զինանոցները։ Գործողությունը ստացել էր «Լայլաթ ալ ղադր» (Ճակատագրի գիշեր) անունը։
Իրանի գործողությունները համաձայնեցվել են նաև Սիրիայի, Իրաքի, Ռուսաստանի հետ։
Ըստ ԻՀՊԿ-ի՝ Իրանի այս քայլը Թեհրանի ահաբեկչական հարձակումների պատասխանն էր, և այն զգուշացում էր ոչ միայն «Իսլամական պետության», այլև նրա տարածաշրջանային և արտատարածաշրջանային հովանավորների համար։
Հունիսի 7-ին Իրանի մայրաքաղաք Թեհրանում ահաբեկիչները հարձակվել էին խորհրդարանի շենքի և Իմամ Խոմեյնու դամբարանի վրա։ Հարձակումների հետևանքով սպանվել էր 17, վիրավորվել՝ 52 մարդ։ Ահաբեկչության պատասխանատվությունը իր վրա էր վերցրել «Իսլամական պետություն» ահաբեկչական խմբավորումը։ Ահաբեկիչներին աջակցելու և նրանց ուղղորդելու համար Իրանը մեղադրում է ԱՄՆ-ին և Սաուդյան Արաբիային։
Նշենք, որ Իրանը համարվում է Սիրիայի ներկայիս կառավարության դաշնակիցներից մեկը և, չնայած Սիրիայում պարբերաբար իրանցի մարտիկներ են զոհվում, այնուամենայնիվ իրանական իշխանությունները մշտապես հերքում են իրենց ռազմական ներկայությունն այդ երկրում: Իրանցի պաշտոնյաները նշում են, որ Իրանը Սիրիայում չունի մարտական ստորաբաժանումներ, ու իրանական կողմը Սիրիա է ուղարկում միայն ռազմական խորհրդատուներ:
ԻՀՊԿ-ն հրթիռակոծել է Դեր Զորում ԻՊ դիրքերը