ՀՀ ՊՆ 5-րդ բանակային կորպուսի զորավարժության ժամանակ ուժեղացված գումարտակը բերվել է մարտական պատրաստականության լրիվ աստիճանի և, ընթացքից անցնելով հարձակման՝ «ջախջախել է» հայկական տարածք մխրճված պայմանական հակառակորդին և վերականգնել առաջնագիծը։
Այս մասին հայտնի է դարձել ՀՀ ՊՆ «Զինուժ» հաղորդաշարի հունիսի 3-ի թողարկումից:
Նախքան բուն վարժանքները յուրաքանչյուր ստորաբաժանում բացազատել է իր ուսումնական կետն ու ներկայացրել այն հնարավորությունները, որոնք առաջնագծում օգնելու են հաջողության հասնել:
Այնուհետև հրետանին մարտական հրաձգությամբ գումարտակային մարտավարական ցուցադրական վարժանքներ է արել: Տանկերը, հետևակի մարտական մեքենաները ու մարտը վարող ստորաբաժանումները, ոչնչացնելով բոլոր թիրախները, առաջ են ընթացել ու պատժել հակառակորդին:
Զորավարժության ընթացքին հետևել է բանակային զորամիավորման հրամանատար, գեներալ-մայոր Կարեն Աբրահամյանը:
Ավելի վաղ նմանատիպ մտահաղացմամբ զորավարժություն էր անցկացվել ՀՀ ՊՆ 3-րդ բանակային կորպուսում: Վարժանքների սցենարով՝ հակառակորդի առաջավոր խմբերը հատել էին սահմանագիծը՝ իրենց օդային դեսանտի նստեցումն ապահովելու նպատակով:
Հայկական զինուժի գումարտակի անձնակազմը, ընթացքից անցնելով հարձակման, նախանշված ժամանակում «ոչնչացրել էր» պայմանական հակառակորդի ուժերը՝ կատարելով առաջադրված մարտական խնդիրները:
One response to “ՀՀ ԶՈւ վարժանքներին խաղարկվել է մխրճված հակառակորդի ոչնչացումը և առաջնագծի վերականգնումը”