Պաշտպանության բանակի դիրքերից մեկում Ռազմինֆոյի լրագրողը հայրենիքի, զինծառայողի ծննդավայրի, սիրած մասնագիտության, առաջին անգամ դիրք բարձրանալու մասին զրուցել է ժամկետային զինծառայողներ, մասնագիտությամբ դերասան Հովհաննես Սերոբյանի ու կրտսեր սերժանտ, մասնագիտությամբ գինեգործ Արմեն Մնացականյանի հետ։
Մասնագիտությամբ դերասան, ազգությամբ հայ, ծննդավայրով գյումրեցի, կոչումով շարքային Հովհաննես Սերոբյանը մեկ տարի է ինչ ծառայում է Պաշտպանության բանակում։
Մինչ ծառայության անցնելը սովորել է Երևանի թատրոնի և կինոյի պետական ինստիտուտի՝ Գյումրիի մասնաճյուղում որպես դերասան։ Ասում է՝ խաղացել է «Լիր արքա» ներկայացման մեջ, որը խաղալու են նաև վաղը և մյուս օրը, բայց ինքն այդ ներկայացման մեջ չկա։ Հարցնում եմ՝ անհանգստանու՞մ է, ուղղում է ՝ նախանձում է, բայց թող խաղացողներն էլ իրեն նախանձեն։
Չէր ուզում գալ ծառայելու, որովհետև նվիրված էր մասնագիտությանը, բայց երբ եկավ, մեկ ամիս – երկու ամիս – երեք ամիս, արդեն կամաց-կամաց ամրապնդվեց։ Ծառայության մասին պատկերացումները սկզբից այլ են եղել և ընդհանրապես այլ էին մարտական դիրքերում ընթացող ծառայության մասին։
Ասում է՝ լացը գալիս է, երբ հիշում է իրեն ծառայության առաջին օրվա ընթացքում։ Ասում է ու ժպտում։ Դիրքեր առաջին անգամ բարձրացել է ութ ամիս առաջ։
«Սրտի թրթիռ, վախ, ամեն ինչը սրտիս՝ դող, սրտիս սարսուռ էր։ Ինձ հետ հերթափոխ կատարող զինվորները անընդհատ հույս էին տալիս, որ հիմա կրակոց է լսվելու, չվախենաս հանկարծ, էս ձենն է գալիս, կդառնա սովորական … Միամիտ, երբ հանկարծ քայլելիս զենքդ քսվի պատին, ձայնից չվախենաս, դառնաս էս կողմ, էն կողմ։ Մանդր-մանդր (ուղղում է ինքն իրեն՝ մանր-մանր — խմբ) բաներ, որոնցից սկզբում վախ էր առաջանում, բայց էդ վախն էլ ծնում էր դուխ կոչվածը»։
Սպասում է մյուս զորակոչին, որ պետք է գա, և բարձրանան դիրքեր, որ նորեկներին էլ ինքը հուսադրի, որ ամեն ինչ լավ է լինելու։
Ասում է կարոտել է ծննդավայրը՝ Գյումրին․ «Չեմ կարող կտրվել իմ Լեննագան կոչվածից։ Քանդված տները … դրանք ամենաշատն եմ կարոտել»։
Շատերն ասում են, որ զորացրվելուց հետո ընկերական կապերը կորում են, իսկ ինքը չի պատկերացում, որ տղաներից ինչ-որ մեկը կարող է կորել։ Իրենք ընկերներ են, մարտական ընկերներ։
Ծառայության ընթացքում իր մեջ ոչինչ չի փոխվել, ամեն ինչ նույնն է մնացել, մի քիչ ջղային է դարձել, դա էլ կանցնի։
«Լավ է, որ ծառայում եմ, ու գնում եմ մասնագիտությունս շարունակեմ»։
Ասում է՝ թող չփախչեն այստեղից (աչքերով դիրքերն է ցույց տալիս), թող գան, կանգնեն, տեսնեն, զգան, պահպանեն։ Հայրենիքը պետք է հենց հայրենիքում սիրել։
Հովհաննեսի դիրքապահ ընկերներից է կրտսեր սերժանտ Արմեն Մնացականյանը, ով երկու ամիս Արմավիրում անցել է սերժանտական դասընթաց, իսկ սերժանտական կոչումը նոր-նոր է ստացել, շուտով կստանձնի նաև դիրքի ավագի պարտականությունները։
Առաջին անգամ դիրքեր է բարձրացել հոկտեմբեր ամսին։ Առաջին օրը անսովոր է եղել, հետո աստիճանաբար հարմարվել է։ Սերժանտի ընկերուհին իրեն շատ է օգնում, ամեն օր խոսում են։
«Դժվարություններ շատ կան, բայց հիմնականը տանեցիներից առանձին լինելն է, բայց երբ նրանց շուտ ես տեսնում, ավելի մոտիկ ես լինում, ծառայությունն ավելի շուտ է անցնում»։
Մասնագիտությամբ գինեգործ է, ծառայությունն ավարտելուց հետո դեռ պլաններ չունի․ «կմտածենք էլի, կարևորը անփորձանք ծառայենք, հետո մնացածի մասին կմտածենք»։
Նորակոչիկների մաղթում է, որ շատն իրենց մասին մտածեն ու անփորձանք ծառայեն։