Հունիսի 1-ին ավարտվել է Տաջիկստանում անցկացվող «Դուշանբե. հակաահաբեկչություն 2017» զորավարժությունը։ Զորավարժության վերջին փուլում «Իսկանդեր-Մ» օպերատիվ-մարտավարական հրթիռային համալիրներով ոչնչացվել են պայմանական ահաբեկիչների պահեստները։ Այս մասին հայտնում է ՌԴ ՊՆ կայքը։
Պայմանական ահաբեկիչներին հարվածներ են հասցվել նաև Տու-23Մ3 ռմբակոծիչներով և «Ուռագան» համազարկային կրակի ռեակտիվ համակարգով։
Մինչ այդ ահաբեիկչներին վնասազերծելու համատեղ գործողություն էին իրականացրել Ռուսաստանի ԶՈւ և Տաջիկստանի ԶՈւ հետախույզները։ Սցենարի համաձայն՝ հետախույզները հայտնաբերել են 350 ահաբեկիչներից կազմված խումբը, որը նպատակադրվել էր գրավել բնակավայր և փակել դաշնային նշանակության ճանապարհը։
Իրավապահ մարմինները փակել են բնակավայր տանող ճանապարհները։ Զինծառայողները Մի-8 ուղղաթիռներից թռուցիկներ են նետել և առաջարկել ահաբեկիչներին հանձնվել։ Առաջարկի չընդունվելուց հետո հատուկջոկատայինների գրոհային խումբը սկսել է «ահաբեկիչների վնասազերծումը»։
Պայմանական ահաբեկիչների դիրքերին հարվածել են նաև Սու-25 գրոհիչներով։ Իսկ Մի-24 ուղղաթիռներով խոցվել է պայմանական ահաբեկիչների 3 մեքենա։
Գործողության վերջին փուլում հատուկջոկատայինները հետապնդել են նահանջող ահաբեկիչներին։ Իսկ արդյունքում պայմանական ահաբեկիչները վնասազերծվել են Մի-8 ուղղաթիռի հրթիռային հարվածներով։
«Դուշանբե հակաահաբեկչություն 2017» զորավարժությունը ԱՊՀ հակաահաբեկչական կենտրոնի կազմակերպած առաջին զորավարժությունն է: Զորավարժության ակտիվ փուլը մեկնարկել էր մայիսի 30-ին։