Այսօր՝ մայիսի 31-ի առավոտյան, Աֆղանստանի մայրաքաղաքում՝ Գերմանիայի դեսպանատան մոտ, ինքնասպան ահաբեկիչը պայթեցրել է պայթուցիկով լցված մեքենա, ինչի հետևանքով, նախնական տվյալներով, զոհվել է մոտ 80 մարդ, վիրավորվել ևս 300-ը: Այս մասին հայտնում է CNN լրատվակայքը:
Նախնական տվյալներով պայթյունի հետևանքով ՀՀ ԶՈւ խաղաղապահները չեն տուժել. փոխանցում է ՀՀ ՊՆ մամուլի խոսնակ Արծրուն Հովհաննիսյանը:
Դիվանագիտական ներկայացուցչությունների դասավորվածությունը Քաբուլում. քարտեզը՝ CNN-ի:
Նախնական տվյալներով պայթյունը իրականացվել է պայթուցիկներով բեռնված մեքենայի միջոցով: Այն տեղի է ունեցել Քաբուլի՝ դիվանագիտական ներկայացուցչությունների համար նախատեսված թաղամասում: Մոտակայքում են գտնվում նաև ԱՄՆ-ի և Հնդկաստանի դեսպանատները: Պայթյունի վայրին մոտ է նաև Աֆղանստանի նախագահական նստավայրը:
Քաբուլի ոստիկանության պետը դժվարացել է նշել, թե որն է եղել ահաբեկիչների հիմնական թիրախը: Երկրի առողջապահության նախարարությունը հավանական է համարում, որ զոհերի թիվը կաճի:
Ահաբեկչության պատասխանատվությունը դեռևս ոչ մի խմբավորում չի ստանձնել, սակայն հավանական է համարվում Թալիբանի և «Իսլամական պետություն» ահաբեկչական խմբավորման աֆղանական ճյուղի մասնակցությունը:
#KabulAttack latest video. pic.twitter.com/OrmfIzw3Yc
— Ishaq sadat (@Ishaqsadat) May 31, 2017