Քրդերից և արաբներից կազմված «Սիրիայի դեմոկրատական ուժեր» (SDF) շարունակում են գրոհը Սիրիայի Տապկա քաղաքի ուղղությամբ և արդեն ամբողջությամբ «Իսլամական պետություն» ահաբեկչական խմբավորումից ազատագրել են քաղաքի հարավային «Ալ-Վահաբ» շրջանը:
Այս մասին հայտնում է քրդական ANF լրատվական գործակալությունը:
Նշվում է, որ այդ ուղղությամբ ընթացող վերջին երկու օրվա մարտերում սպանվել է ԻՊ շուրջ 20 ահաբեկիչ, ինչպես նաև ոչնչացվել են զինամթերքի արտադրամաս և զրահամեքենաներ:
Մարտական գործողություններում SDF-ին օժանդակել է նաև միջազգային կոալիցիան՝ վերջին երկու օրում շուրջ 6 ավիահարված հասցնելով ԻՊ դիրքերին:
ԻՊ ահաբեկիչներից առգրավվել է նաև սպառազինություն, այդ թվում ՝ տանկ, ինքնաձիքներ և պայթուցիկ սարքեր:
Նշենք, որ մարտին «Սիրիայի դեմոկրատական ուժերը» (SDF) կարողացել էին վերահսկողություն հաստատել Սիրիայի խոշորագույն ջրամբարի տարածքում, ինչպես նաև «Իսլամական պետություն» խմբավորումից գրավել Տապկայի ավիաբազան:
Տապկան Սիրիայի և Իրաքում «Իսլամական պետության» «մայրաքաղաքը» համարվող Ռաքքա քաղաքից շուրջ 45 կմ հեռավորության վրա է, և Ռաքքայի ազատագրման գործողության համար կարևոր նշանակություն ունի:
Նշենք նաև, որ ապրիլի 26-ին քրդական ուժերը թուրք-սիրիական սահմանին խոցել են նաև Թուրքիայի ԶՈւ երկու միավոր տանկ: