Թրամփը Պենտագոնին թույլատրել է փոփոխել Սիրիայում և Իրաքում անձնակազմի քանակը

ԱՄՆ նախագահ Դոնալդ Թրամփը Պենտագոնին (ԱՄՆ պաշտպանության նախարարություն) թույլատրել է ինքնուրույն գործել Սիրիայում և Իրաքում իրականացվող ռազմագործողությունների ընթացքում: Այդ թվում ԱՄՆ ՊՆ ղեկավարը ստացել է Իրաքում և Սիրիայում ներգրավված զինծառայողների թվաքանակը փոփոխելու լիազորություն:

Այս մասին այսօր՝ ապրիլի 27-ին հայտնում է ռուսաստանյան «ՏԱՍՍ» լրատվական գործակալությունը՝ փոխանցելով ԱՄՆ ՊՆ աշխատակից Քրիստոֆեր Շերվուդից ստացած տեղեկությունը:

Պենտագոնի ներկայացուցիչը նշել է, որ Թրամփը այդ լիազորությունները տրամադրել է ԱՄՆ պաշտպանության նախարար Ջեյմս Մետտիսի համապատասխան դիմումի հիման վրա: Սակայն, ըստ Շերվուդի, առայժմ Սիրիայում և Իրաքում տեղակայված ամերիկյան զինծառայողների թվաքանակը չի ավելացվել:

Շերվուդը նշել է, որ ԱՄՆ բանակի մարտավարությունում ևս փոփոխություններ չկան: Ամերիկյան ստորաբաժանումները շարունակելու են հենվել տեղական ուժերի հետ համագործակցության վրա: Իսկ Իրաքում անցկացվող բոլոր գործողությունները բխելու են Բաղդադի հետ կայացած համաձայնություններից:

Իրաքի Մոսուլ քաղաքում ԻՊ դեմ գործողություններին ներգրավված ԱՄՆ բանակի հատուկ ջոկատայիններ

Իրաքի Մոսուլ քաղաքում ԻՊ դեմ գործողություններին ներգրավված ԱՄՆ բանակի հատուկ ջոկատայիններ

Ըստ Պենտագոնի ներկայացուցչի՝ այս փոփոխությունը թույլ կտա հրամանատարներին տեղերում ավելի շարժունակ լինել և ավելի օպերատիվ որոշումներ կայացնել:

Ըստ «ՏԱՍՍ»-ի տվյալների՝ Միացյալ Նահանգները ներկայում Իրաքում տեղակայել է 5262, իսկ Սիրիայի տարածքում՝ 503 զինծառայող:

Ավելացնենք, որ Իրաքում տեղակայված ստորաբաժանումները 2016 թ. հոկտեմբերից ներգրավված են Մոսուլում «Իսլամական պետություն» ահաբեկչական կազմակերպության դեմ ռազմական գործողություններին: Սակայն հիմնական ուժը կազմում են Իրաքի բանակի և տեղի քրդական ինքնավարության ստորաբաժանումները:

Սիրիայի տարածքում ամերիկյան զինծառայողները տեղակայված են տեղի քրդերի վերահսկողության տակ գտնվող տարածքներում և դաշնակցում են նրանց հետ: Այս հանգամանքը քանիցս հանգեցրել է Թուրքիայի և ԱՄՆ միջև լուրջ հակասությունների: Թուրքիան քրդական այդ կառույցներին դիտարկում է որպես Թուրքիայում ահաբեկչական կառույց ճանաչված «Քրդստանի աշխատավորական կուսակցության» (PKK) «սիրիական թև»:

Սակայն Պենտագոնի ներկայացուցչի հայտարարությունից բխում է, որ ամերիկյան կողմը շարունակելու է դաշանկցել քրդերի հետ Իրաքի և Սիրիայի տարածքում:

Ամերիկյան զրահամեքենաները Մանբիջից հյուսիս ընկած Յալանլը գյուղի մոտ: 3/5/2017. լուսանկարը՝ AFP-ի

Ամերիկյան զրահամեքենաները Մանբիջից հյուսիս ընկած Յալանլը գյուղի մոտ: 3/5/2017. լուսանկարը՝ AFP-ի

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *