Հյուսիսային Օսիայի «Տարսկոյե» զորավարժարանում ավարտվել են ՌԴ ԶՈւ հարավային ռազմական շրջանի 58-րդ համազորային բանակի հրետանային ստորաբաժանումների հրամանատարաշտաբային վարժանքները։ Այս մասին ապրիլի 25-ին տեղեկացնում է ռուսաստանյան «ՌԻԱ նովոստի» լրատվական գործակալությունը։
Զորավարժության շրջանակներում հրետանավորները հետախուզական տվյալներ ստանալուց հետո ոչնչացրել են բնակելի տարածքներ գրավել փորձող պայմանական ահաբեկիչներին։
ՌԴ ԶՈւ Մստա-Բ հաուբիցը կրակի ժամանակ
Զորավարժությանը ներգրավվել էր շուրջ 200 զինծառայող, ավելի քան 30 միավոր զինտեխնիկա՝ այդ թվում «Ուռագան» համազարկային կրակի ռեակտիվ համակարգեր, «Մստա-Բ» հաուբիցներ։
Ռուսաստանի զինված ուժերի հարավային ռազմական շրջանն ընդգրկում է Սև և Կասպից ծովերի միջակայքի ռուսաստանյան տարածքում, Ղրիմում, Աբխազիայում, Հարավային Օսիայում, ինչպես նաև Հայաստանում տեղակայված ՌԴ ԶՈւ զորամասերը: Այս միավորման ենթակայության տակ են նաև Սիրիայում գործող ռուսաստանյան ստորաբաժանումները: